साताको अन्तिम कारोबार दिन बिहीबार धितोपत्र बजार (नेप्से) परिसूचकमा सामान्य सुधार देखिएको छ। उतारचढावका बीच नेप्से ६.९४ अङ्कले बढेर २,७१८.१६ विन्दुमा कायम भएको हो। परिसूचक सकारात्मक देखिए पनि लगानीकर्तामा पर्ख र हेरको अवस्था कायम रहँदा कारोबार रकम भने खुम्चिएको छ।

आज नेप्सेमा ३३४ कम्पनीको ४५ हजार ६५ पटकको खरिद–बिक्रीबाट ६६ लाख ८४ हजार ७ कित्ता सेयर किनबेच भएको छ। कुल २ अर्ब ९३ करोड १९ लाख ६८ हजार ८७७ रूपैयाँको कारोबार भएको नेप्सेले जनाएको छ। बुधबारको तुलनामा यो करिब २६ करोड रूपैयाँको गिरावट हो। अघिल्लो दिन ३ अर्ब १९ करोडको कारोबार भएको थियो।

आज कारोबारमा आएका १३ उपसमूहमध्ये ८ वटामा हरियाली छाएको छ भने ५ वटा राताम्मे देखिएका छन् । बढ्ने समूहमा व्यापार समूह सर्वाधिक १.५७% ले उकालो लागेको छ। यस्तै अन्य (०.८३%), लघुवित्त (०.३५%), र बैंकिङ (०.३३%) समूहमा सामान्य सुधार आएको छ।

घट्ने समूहमा निर्जीवन बिमा समूह ०.५६% ले ओरालो लाग्दा म्युचुअल फन्ड, उत्पादन तथा प्रशोधन र वित्त समूहमा पनि गिरावट देखिएको छ।

आजको बजारमा स्वावलम्बन लघुवित्तका लगानीकर्ताले सर्वाधिक कमाएका छन्। यसको सेयर मूल्य १२.१९% ले वृद्धि भई प्रतिकित्ता ८१० रूपैयाँ पुगेको छ। यस्तै श्रीजनशील लघुवित्तको मूल्य ४.२९% ले बढेको छ।

यता, फरवार्ड माइक्रोफाइनान्सका लगानीकर्ताले भने ठूलो झट्का बेहोरेका छन्। सो कम्पनीको सेयर मूल्य १३.२४% ले गिरावट आएर १,१२७.९० रूपैयाँमा झरेको छ। अपर लोहोरे खोला हाइड्रोपावरको मूल्य पनि ९.१२% ले घटेको छ। 

कारोबार रकमका आधारमा एनआरएन इन्फ्रास्ट्रक्चर एन्ड डेभलपमेन्ट लिमिटेड शीर्ष स्थानमा रह्यो। सो कम्पनीको १७ करोड ६८ लाख रूपैयाँ बराबरको सेयर कारोबार भएको छ, यद्यपि यसको मूल्य २.५२% ले घटेको छ। सेयर सङ्ख्याका आधारमा भने नेसनल हाइड्रोपावर लिमिटेड अगाडि देखिएको छ, जसको १४ करोड ३४ लाख रूपैयाँ बराबरको ५ लाख २६ हजार कित्ता सेयर किनबेच भयो।

बिहीबार कुल १५५ कम्पनीको मूल्य बढ्दा १०२ कम्पनीको मूल्य घटेको छ भने १२ वटाको स्थिर रहेको छ।