नेपाल वैदेशिक रोजगार व्यवसायी सङ्घले आफ्ना विभिन्न मागहरूप्रति सरकारले उदासीनता देखाएको भन्दै सोमबारदेखि देशभरका सम्पूर्ण म्यानपावर व्यवसाय बन्द गर्ने घोषणा गरेको छ। यससँगै म्यानपावर कार्यालयहरू मात्र नभई तिनमार्फत वैदेशिक रोजगारीमा जाने श्रमिक पठाउने सम्पूर्ण प्रक्रियासमेत पूर्ण रूपमा रोकिएको सङ्घले जनाएको छ।
सङ्घले यसअघि चरणबद्ध आन्दोलनअन्तर्गत पूर्व तथा अन्तिम श्रम स्वीकृति, नयाँ विज्ञापन र भिसा स्ट्याम्पिङ रोक्का गरिसकेको थियो। यसअघि श्रम स्वीकृति प्राप्त भइसकेका श्रमिकहरूको उडानका लागि दिइएको समयसीमा समाप्त भएपछि सोमबारदेखि सबै काम-कारोबार ठप्प पारिएको हो।
सङ्घका वरिष्ठ उपाध्यक्ष महेशकुमार बस्नेतले आइतबार राति १२ बजेसम्म सबै म्यानपावरलाई प्रक्रिया पूरा भएका श्रमिकको उडान गर्न एक साताअघि नै परिपत्र (सर्कुलर) जारी गरिएको बताएका छन्। उनका अनुसार राति १२ बजेसम्म प्रक्रिया पूरा भएकाहरूको मात्र उडान भएको र त्यसपछि भने सबै उडानहरू बन्द गरिएका छन्।
श्रम मन्त्रालयको टोलीसँग शुक्रबार भएको प्रारम्भिक छलफलमा व्यवसायीका मागहरूबारे कुनै ठोस सहमति जुट्न सकेको थिएन। मन्त्रालयको टोलीसँग छलफल भए पनि मन्त्रीस्तरमा वार्ता नभएको र सरकारले समस्या समाधानलाई प्राथमिकतामा नराखेको सङ्घको आरोप छ।
सोमबारदेखि काठमाडौँस्थित मुख्य कार्यालय, देशभरका शाखा कार्यालयहरू, नयाँ विज्ञापन, अन्तर्वार्ता, सम्पूर्ण रिक्रुटिङ प्रक्रिया, पूर्व-निर्धारित सम्पूर्ण श्रमिक उडान तथा वैदेशिक रोजगारीसँग सम्बन्धित सरकारी एवं प्रशासनिक काम-कारोबार पूर्ण रूपमा बन्द भएका छन्।
सङ्घका महासचिव हीराबहादुर डाँगीद्वारा जारी विज्ञप्तिमा यो आन्दोलन समग्र व्यवसायीको पेसागत अस्तित्व, सम्मान, अधिकार र दीर्घकालीन भविष्यसँग जोडिएको निर्णायक अभियान, भएको उल्लेख छ। विज्ञप्तिमा भनिएको छ, ‘हाम्रा जायज मागहरूको ठोस सम्बोधन, निर्णय र कार्यान्वयनको विश्वसनीय आधार नआएसम्म सङ्घर्ष फिर्ता वा स्थगित गरिने छैन।’
सङ्घले वार्ताका लागि ढोका खुला रहेको बताए पनि सरकारको तर्फबाट ठोस कदम नआएसम्म काममा नफर्कने अडान लिएको छ। साथै, आफ्ना सदस्य संस्थाहरूलाई लुकिछिपी वा वैकल्पिक माध्यमबाट कार्यालय सञ्चालन नगर्न स्पष्ट निर्देशन दिइएको छ। यदि यो निर्णय अवज्ञा गरी काम सुचारु राखेमा त्यस्ता संस्थालाई भविष्यमा सङ्घबाट प्राप्त हुने सहयोग र संरक्षणबाट वञ्चित गरिने र आगामी समीक्षा भेलाबाट कडा कारबाही अगाडि बढाइने चेतावनीसमेत सङ्घले दिएको छ।
तपाईको प्रतिक्रिया दिनुहोस