१५० मेगावाट बिजुली किन्न प्राधिकरणले फेरि बोलपत्र आह्वान गर्ने
आगामी सुख्खायाममा विद्युत आपूर्ति सहज बनाउन नेपाल विद्युत प्राधिकरणले भारतबाट १५० मेगावाट विद्युत खरिद गर्ने प्रक्रिया अघि बढाएको छ । सन् २०२७ को जनवरीदेखि मे महिनासम्म विद्युत आयात गर्ने गरी प्राधिकरणले अन्तर्राष्ट्रिय बोलपत्र (टेन्डर) आह्वान गर्ने तयारी गरेको हो ।
भारतका अनुमतिप्राप्त विद्युत व्यापारिक कम्पनीहरूसँग प्रतिस्पर्धात्मक दरमा बिजुली किन्न बोलपत्र माग गर्न लागिएको प्राधिकरण सञ्चालक समितिले जनाएको छ । समिति सदस्य अंशु किरण शाहीका अनुसार प्राधिकरणले १५० मेगावाट विद्युत चौबिसै घण्टा अर्थात् 'राउन्ड द क्लक' (आरटीसी) मोडमा खरिद गर्ने योजना बनाएको छ ।
पछिल्ला दुई-तीन वर्षदेखि सुख्खायाममा आन्तरिक उत्पादनले माग धान्न नसक्दा प्राधिकरणले इन्डियन इनर्जी एक्सचेन्ज (आईईएक्स) को 'डे अहेड' र 'रियल टाइम' मार्केटबाट बिजुली किन्दै आएको छ । यस वर्ष भोटेकोशी नदीमा आएको हिमबाढीका कारण निर्माणाधीन तथा सञ्चालनमा रहेका आयोजनाको करिब ४३० मेगावाट विद्युत प्रणालीबाट बाहिरिएपछि आपूर्ति व्यवस्थापन थप चुनौतीपूर्ण बनेको छ ।
प्राधिकरणको विद्युत व्यापार विश्लेषण समितिले गत भदौ २५ गते नै जनवरीदेखि मेसम्म १५० मेगावाट बिजुली आरटीसी मोडमा किन्न व्यवस्थापनसमक्ष सिफारिस गरेको थियो । अप्रिल र मे महिनामा माग झनै बढ्ने भएकाले त्यसबेलाको अवस्था र भारतीय बजारको उपलब्धता हेरेर आईईएक्सबाट थप विद्युत खरिद गर्नुपर्ने समितिको निष्कर्ष छ ।
आगामी सुख्खायामसम्म राष्ट्रिय प्रणालीमा करिब ३०० मेगावाट क्षमताका नयाँ आयोजना जोडिने अपेक्षा छ । तर, हिउँदमा नदीको बहाव घट्ने भएकाले ती आयोजनाबाट करिब ९० मेगावाट मात्रै विद्युत उत्पादन हुने अनुमान छ, जसले आन्तरिक उत्पादनबाटै माग धान्न कठिन हुने देखिन्छ ।
पुरानो सम्झौता भाँडिएपछि नयाँ प्रक्रिया
यसअघि प्राधिकरणले १५० मेगावाट बिजुली किन्न तीन भारतीय कम्पनीसँग दररेट प्रस्ताव मागेको थियो । जसमा एनटीपीसी ट्रेडिङ कर्पोरेसन लिमिटेडले प्रतियुनिट ६ रुपैयाँ ९० पैसा (भारु), मनिकरण इनर्जी लिमिटेडले ८ रुपैयाँ ५० पैसा (भारु) र एसजेभीएन लिमिटेडले ९ रुपैयाँ (भारु) प्रस्ताव गरेका थिए ।
सबैभन्दा कम दर प्रस्ताव गर्ने एनटीपीसीलाई प्राधिकरणले असोज १६ गते आशयपत्र (एलओआई) जारी गरी असोज २९ गते सम्झौताका लागि बोलाएको थियो । तर, असोज ३० गते पत्र पठाउँदै एनटीपीसीले पुरानो दरमा सम्झौता गर्न नसक्ने जानकारी गरायो । भूराजनीतिक अनिश्चितता, कोइला तथा इन्धनको मूल्यवृद्धि, एल निनो प्रभाव र भारतभित्रै बढेको विद्युत मागलाई कारण देखाउँदै एनटीपीसीले दर पुनरावलोकन गर्नुपर्ने अडान लिएको छ ।
भारतीय बजारमा महँगियो बिजुली
यसैबीच, भारतीय विद्युत बजारको 'डे अहेड मार्केट' मा गत असोजको औसत बजार समायोजन मूल्य (एमसीपी) प्रतियुनिट ७ रुपैयाँ ३४ पैसा भारु (११ रुपैयाँ ७४ पैसा नेरु) पुगेको छ । भारतीय बजारमै बिजुली महँगिएपछि अघिल्लो प्रस्तावित दरमा सम्झौता हुन नसकेको हो ।
पुरानो दरमा सम्झौता नहुने निश्चित भएपछि र सुख्खायाममा माग तथा आपूर्तिको खाडल बढ्ने देखिएपछि प्राधिकरणले नयाँ प्रतिस्पर्धात्मक बोलपत्रको बाटो रोजेको हो । समयमै आयातको सुनिश्चितता गर्न सके आगामी हिउँदको आपूर्ति जोखिम न्यूनीकरण गर्न सकिने प्राधिकरणको विश्वास छ ।



तपाईको प्रतिक्रिया दिनुहोस