सुदूरपश्चिम प्रदेश सरकार, सामाजिक विकास मन्त्रालयले चिकित्सा शिक्षा (एमबिबिएस) अध्ययन गर्न चाहने विद्यार्थीहरूका लागि छात्रवृत्ति आवेदन खुला गरेको छ। मन्त्रालयले एक सूचना जारी गर्दै चालु शैक्षिक सत्रका लागि खुला र समावेशी कोटामा आवेदन माग गरेको हो।

मन्त्रालयका अनुसार, प्रदेश सरकारको लगानीमा विद्यार्थीलाई छात्रवृत्ति उपलब्ध गराइनेछ। कुल ९ वटा सिटका लागि आवेदन माग गरिएकोमा सबैभन्दा बढी खुलातर्फ ५ जनाको कोटा निर्धारण गरिएको छ।

बाँकी ४ सिट समावेशी समूहका लागि छुट्याइएको छ। जसमा विवरण निम्नअनुसार छ:

खुला: ५ जना

महिला: १ जना

दलित: १ जना

थारु: १ जना 

अपाङ्गता भएका: १ जना

आवेदन दिने अन्तिम मिति: इच्छुक तथा योग्यता पुगेका विद्यार्थीहरूले यही मंसिर १६ गते कार्यालय समयभित्र मन्त्रालयमा आवश्यक कागजातसहित निवेदन पेस गरिसक्नुपर्नेछ। तोकिएको समयसीमाभित्र प्राप्त नभएका र रित नपुगेका निवेदनमाथि कुनै कारबाही नहुने मन्त्रालयले जनाएको छ।

सूचना हेर्नुहोस् -