गाँजा बोकेको भन्दै प्रहरीले लखेट्ने क्रममा पोखरीमा हामफालेका एक किशोरको शव तीन दिनपछि फेला परेपछि विराटनगरमा तीव्र तनाव उत्पन्न भएको छ । विराटनगर महानगरपालिका–१८ भेडियारीका १७ वर्षीय मञ्जितकुमार यादवको शव शुक्रबार बिहान स्थानीय पोखरीमा तैरिरहेको अवस्थामा फेला परेको हो ।

मोरङ प्रहरीका प्रवक्ता प्रहरी नायब उपरीक्षक (डीएसपी) सन्तोष श्रेष्ठका अनुसार गत बुधबारदेखि बेपत्ता भएका यादवको शव शुक्रबार बिहान करिब साढे १० बजे पोखरीको बीच भागमा फेला परेको थियो । शव भेटिएलगत्तै आक्रोशित बनेका स्थानीय र मृतकका आफन्तले प्रहरी टोलीमाथि ढुङ्गामुढा गरेपछि स्थिति नियन्त्रणमा लिन प्रहरीले लाठीचार्ज गरेको छ ।

घटनास्थलमा ढुङ्गामुढा र लाठीचार्ज
शवलाई पोस्टमार्टमका लागि लैजाने क्रममा स्थानीय बासिन्दाले सुरक्षाकर्मीलाई नै लक्षित गरी ढुङ्गामुढा गरेका थिए । प्रहरीमाथि आक्रमण गरेको आरोपमा मृतकका आफन्त पर्ने एक युवकलाई नियन्त्रणमा लिइएको छ ।

प्रहरीले मृतक मञ्जितको शव पोस्टमार्टमका लागि कोशी अस्पताल पुर्‍याए पनि आफन्त र स्थानीयले शव उठाउन र प्रक्रिया अगाडि बढाउन लामो समय अवरोध सिर्जना गरेका थिए । आन्दोलनमा उत्रिएका स्थानीयले किशोरलाई लखेट्ने प्रहरी टोलीमाथि तत्काल कारबाही गर्नुपर्ने, घटनाको निष्पक्ष छानबिन हुनुपर्ने र मृतकका परिवारलाई उचित क्षतिपूर्ति दिनुपर्ने माग राख्दै सडक समेत अवरुद्ध गरेर नाराबाजी गरेका थिए ।

के थियो घटनाको पृष्ठभूमि?
प्रहरीको दाबीअनुसार गत बुधबार भारतीय नम्बर प्लेटको मोटरसाइकलमा गाँजा ओसारपसार भइरहेको सूचनाका आधारमा प्रहरीले चेकजाँच गर्न खोजेको थियो । तर, प्रहरीको चेकिङ छलेर भाग्ने क्रममा मोटरसाइकल चालक मञ्जितकुमार यादव सवारीसाधन छाडेर नजिकैको पोखरीमा हामफालेका थिए । त्यसपछि उनी बेपत्ता भएका थिए ।

उक्त घटनामा मोटरसाइकलको पछाडि सवार भारतका ४१ वर्षीय शिवधर यादवलाई प्रहरीले ६ किलो १३० ग्राम गाँजासहित घटनास्थलबाटै पक्राउ गरेको थियो । बेपत्ता किशोरको खोजीका लागि बुधबारदेखि नै नेपाल प्रहरी, सशस्त्र प्रहरी र स्थानीय बासिन्दाले संयुक्त रूपमा खोजी अभियान चलाएका थिए । तर, शुक्रबार शव भेटिएसँगै प्रहरीको कार्यशैलीलाई लिएर स्थानीय समुदाय आक्रोशित बनेको हो ।