भदौ २३ र २४ गतेको जेनजी प्रदर्शनका क्रममा लुटिएका सामान बुझाइदिन राष्ट्रपति कार्यालयले आइतबार सार्वजनिक सूचना जारी गरेको छ।

कार्यालयले आगलागी र तोडफोडका क्रममा कम्प्युटर, ल्यापटप, प्रिन्टर, स्क्यानर, टेलिभिजन, कुर्सीलगायत भौतिक सामग्री कार्यालय परिसरबाट चोरी भएको उल्लेख गर्दै ती सामान भेटिए वा कसैको साथमा भए बुझाइदिन आग्रह गरेको हो।

सूचनामा भनिएको छ, “राष्ट्रपति कार्यालय जि.खा.पा. नं. अंकित वा अनंकित समान देख्नुभयो वा भेट्नुभयो वा कुनै माध्यमबाट आफ्नो साथमा रहन गएको छ भने यस कार्यालयमा बुझाई सहयोग गरिदिनुहुन यो सूचना प्रकाशित गरिएको हो।”

कार्यालयले सूचना दिने व्यक्तिको परिचय गोप्य राखिने जनाएको छ।