युक्रेनले भर्खरै प्राप्त गरेको अमेरिकी एफ-१६ लडाकु विमान रूसी आक्रमणलाई विफल पार्ने प्रयासमा दुर्घटनाग्रस्त हुँदा युद्धको गतिशीलतामा नयाँ मोड आएको छ।
रूसी आक्रमणलाई विफल पार्न प्रयोग गरिएको एफ-१६ लडाकु विमान दुर्घटना हुँदा एक जना पाइलटको मृत्यु भएको छ। युक्रेनी सेनाले दुर्घटनाको कारणको बारेमा अनुसन्धान गरिरहेको भए पनि केही विज्ञहरूले यो घटनालाई लिएर विभिन्न अनुमानहरू लगाएका छन्।
गत सोमबार रूसले एकैपटक धेरै स्थानमा २०० भन्दा बढी मिसाइल र ड्रोनले आक्रमण गरेको थियो। सो हमलालाई विफल पार्न युक्रेनले भर्खरै प्राप्त एफ-१६ लडाकु विमान र विमान झार्ने मिसाइलहरूको प्रयोग गरेको थियो। त्यस क्रममा रूसी मिसाइल खसाउन खटाइएको सो विमान दुर्घटना भएको युक्रेनले जनाएको छ।

एक युक्रेनी सांसदले अमेरिकी प्याट्रिएट मिसाइल-डिफेन्स सिस्टमले रूसी आक्रमण रोक्ने क्रममा भूलवश सो लडाकु विमान खसालेको दाबी गरेकी छन्। तर युक्रेनले सो विमान के कारणले खसेको भनेर जानकारी दिएको छैन र कारण पत्ता लगाउन छानबिन सुरू गरिसकेको बताएको छ। रूसले पनि अहिलेसम्म आफूले सो विमान खसालेको दाबी गरेको छैन।
एफ-१६ लडाकु विमान युक्रेनका लागि निकै महत्वपूर्ण हतियार हो। यसले युक्रेनी सेनालाई रूसी हवाई आक्रमणको सामना गर्न मद्दत गर्ने अपेक्षा गरिएको थियो। तर यो दुर्घटनाले युक्रेनको हवाई क्षमतामा नराम्रो असर पर्ने छ । अमेरिकाले यो घटनाबारे गहिरो चासो व्यक्त गरेको छ। अमेरिकी रक्षा अधिकारीहरूले दुर्घटनाको कारण पत्ता लगाउन अनुसन्धान भइरहेको बताएका छन्।

#Ukrane_War