Techie IT
२०८२ भाद्र १३, शुक्रबार

एनपीएलमा सुदूरपश्चिम रोयल्सको दबदबा, लुम्बिनीको कठिन यात्रा

सुदूरपश्चिम रोयल्सले लिगमा आफ्नो स्थान बलियो बनाएको छ भने लुम्बिनीको लागि चुनौती झन् कठिन बन्दै गएको छ। आगामी खेलहरू लुम्बिनीका लागि निर्णायक हुनेछन् भने सुदूर आफ्नो विजयी यात्रा कायम राख्न उत्सुक देखिन्छ।


नेपाल प्रिमियर लिग (एनपीएल) मा सुदूरपश्चिम रोयल्स टिमले सन्तुलित प्रदर्शन गर्दै सबैभन्दा बलियो टिमको छवि बनाएको छ। कप्तान दिपेन्द्र सिंह ऐरीको नेतृत्वमा सुदूरले खेलेका तीनवटै खेलमा शानदार जित दर्ता गर्दै प्लेअफमा स्थान पक्का गर्ने सम्भावना बलियो बनाएको छ।

सुदूरपश्चिमको दबदबा
तीन खेलमा लगातार जित निकालेको सुदूरले पहिलो खेलमा विराटनगरमाथि ९० रनको, दोस्रो खेलमा काठमाडौं गुर्खाजमाथि ७३ रनको, र तेस्रो खेलमा लुम्बिनी अल स्टार्सलाई ४५ रनको फराकिलो अन्तरले पराजित गर्यो। प्रशिक्षक जगत टमटा टिमको प्रदर्शनबाट खुसी देखिँदै भने, “देशभरिका समर्थकले दिएको मायाले हाम्रो खेलाडीहरू थप प्रेरित भएका छन्। ओपनिङ साझेदारीदेखि फिल्डिङसम्म सबै पक्षमा सुधार देखिएको छ।” 

सुदूरका लागि खेलाडीहरूको व्यक्तिगत प्रदर्शनले पनि महत्त्वपूर्ण भूमिका खेलेको छ । सैब जैबले लुम्बिनीविरुद्ध ९० रनको उत्कृष्ट इनिङ खेलेर एक विकेट पनि लिएका थिए भने युवा बलर नरेन यादवले काठमाडौंविरुद्ध ५ विकेट लिएर प्रभावशाली प्रदर्शन गरे। सुदूरको टिममा विदेशी खेलाडीको रुपमा रहेका रोहन मुस्तफा व्यक्तिगत कारणले लिगबाट बाहिरिएका छन्। प्रशिक्षक टमटाले उनको योगदान सीमित रहे पनि टिमको लयमा असर नपर्ने बताएका छन्।

लुम्बिनी अल स्टार्सको लागि यो लिग अहिलेसम्म निराशाजनक देखिएको छ। कप्तान रोहित पौडेलको नेतृत्वमा लुम्बिनीले खेलेका तीनै खेल गुमाउँदै अंक तालिकाको अन्त्यमा छ।

पहिलो खेलमा विराटनगरसँग २ विकेटले हार
दोस्रो खेलमा पोखरासँग १० विकेटको फराकिलो हार
तेस्रो खेलमा सुदूरसँग ४५ रनको हार
लुम्बिनीको मुख्य समस्या बलिङ र फिल्डिङमा देखिएको छ। प्रशिक्षक नन्दन पड्निसले भने, “हाम्रो बलिङ रणनीति मैदानमा कार्यान्वयन हुन सकेको छैन। फिल्डिङको कमजोरीले पनि हाम्रो नतिजामा असर गरेको छ।”

लुम्बिनीको प्लेअफमा स्थान सुरक्षित गर्न बाँकी रहेका सबै खेल जित्नुपर्नेछ। चौथो खेलमा जनकपुर रोयल्सविरुद्धको सामना उनीहरूका लागि “डु या डाइ” साबित हुनेछ। प्रशिक्षक पड्निसले भने, “जनकपुर एक उत्कृष्ट टिम हो, तर हामी नयाँ रणनीतिसँग मैदानमा उत्रनेछौं।”

सुदूरपश्चिम रोयल्सले लिगमा आफ्नो स्थान बलियो बनाएको छ भने लुम्बिनीको लागि चुनौती झन् कठिन बन्दै गएको छ। आगामी खेलहरू लुम्बिनीका लागि निर्णायक हुनेछन् भने सुदूर आफ्नो विजयी यात्रा कायम राख्न उत्सुक देखिन्छ।



तपाईको प्रतिक्रिया दिनुहोस



सम्बन्धित खवर

Techie IT
प्रीतिबाट युनिकोड

© Preeti to Unicode
रोमनाइज्ड नेपाली

© Nepali Unicode
ताजा अपडेट