नेपाल प्रिमियर लिग (एनपीएल) क्रिकेट अन्तर्गत बुधबारको खेलमा सुदूरपश्चिम रोयल्सले जनकपुर बोल्ट्सलाई जितका लागि १२४ रनको लक्ष्य दिएको छ। कीर्तिपुरस्थित अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको रोयल्सले २० ओभरमा ९ विकेट गुमाउँदै १२३ रनको योगफल तयार पारेको हो।

विनोद भण्डारीको ३३ रनको योगदान
रोयल्सका ओपनर विनोद भण्डारीले ३३ रन बनाउँदै टोलीलाई सानदार सुरुवात दिलाए। उनले ३७ बलमा एक छक्का र तीन चौकाको मद्दतले यो रन जोडे। विनोदले सेफ अली जेबसँग ५५ रनको महत्वपूर्ण साझेदारी गरे। जेबले २१ बलमा दुई छक्कासहित २१ रन बनाए।

तर, त्यसपछि टोलीको मध्यक्रमले प्रभाव जमाउन सकेन। कप्तान दीपेन्द्रसिंह ऐरी खाता नै खोल्न नसकी पेभेलियन फर्किए भने तेस्रो नम्बरमा आएका हरमित सिंह पनि केवल १ रनमा आउट भए। इशान पाण्डेले १४ बलमा १७ रन थपे। स्कट कुगेलियनले तीन बलमा एक छक्कासहित ७ रन बनाए।

जनकपुरका बलरको प्रदर्शन उत्कृष्ट
जनकपुरका बलर किशोर महतोले चार विकेट लिए। उनले चार ओभरमा ३५ रन खर्चिए। शेर मल्ल र अरनिको यादबले दुई–दुई विकेट हात पारे भने हर्ष थाकेरले एक विकेट लिए।

यो खेल जनकपुर बोल्ट्सको पाँचौँ खेल हो। यसअघि चार खेलमा लगातार जित हात पारेको जनकपुर बोल्ट्स तालिकाको शीर्षस्थानमा छ। उनीहरूले ८ अंक जोडेका छन्।
सुदूरपश्चिम रोयल्सले भने चार खेलमा तीन जित र एक हारसहित तालिकाको दोस्रो स्थानमा छ।

तालिकाको वर्तमान अवस्था:
जनकपुर बोल्ट्स: ८ अंक
सुदूरपश्चिम रोयल्स: ६ अंक
चितवन राइनोज: ६ अंक
कर्णाली याक्स: ६ अंक
लुम्बिनी लायन्स: २ अंक
काठमाडौँ गुर्खाज: २ अंक
पोखरा एभेन्जर्स: २ अंक
विराटनगर किङ्स: २ अंक
जनकपुर बोल्ट्सलाई शीर्षस्थान कायम राख्न सुदूरपश्चिमको बलियो चुनौती पार गर्नुपर्नेछ। खेलको दोस्रो इनिङ्समा जनकपुरको ब्याटिङ कस्तो रहनेछ भन्ने प्रतिक्षाको विषय बनेको छ।