कोशी प्रदेशमा माघ २२ गतेदेखि सञ्चालन हुने एचपिभी (ह्युमन पापिलोमा भाइरस) खोप अभियानका लागि सम्पूर्ण तयारी पूरा भएको छ । दुई चरणमा सञ्चालन गरिने यो अभियान फागुन ४ गते सम्पन्न हुनेछ ।

राष्ट्रिय खोप कार्यक्रमअनुसार सञ्चालन हुने यस अभियानअन्तर्गत १० देखि १४ वर्ष उमेर समूहका किशोरीहरूलाई खोप लगाइने छ । प्रदेशभर २ लाख २० हजार ५८४ किशोरीलाई खोप दिने लक्ष्य राखिएको स्वास्थ्य निर्देशनालय धनकुटाका सहजकर्ता भरत भण्डारीले जानकारी दिए ।

विद्यालयमा अध्ययनरत किशोरीहरूलाई विद्यालयमै खोप लगाइनेछ भने विद्यालयबाहिर रहेका ४५ हजार ३३४ किशोरीलाई पनि खोप सुनिश्चित गर्न थप खोप केन्द्रहरू स्थापना गरिनेछ ।

यो अभियान पाठेघरको मुखको क्यान्सरबाट महिलाहरूलाई सुरक्षित गराउने उद्देश्यले सञ्चालन गरिएको हो। स्वास्थ्य निर्देशनालयका निर्देशक ज्ञानबहादुर बस्नेतका अनुसार महिलाहरूमा यो क्यान्सरको जोखिम उच्च भएकाले, अकाल मृत्यु रोक्न खोप लगाउनु आवश्यक छ ।

स्वास्थ्य मन्त्रालय, कोशी प्रदेशकी सचिव डा. राधिका थपलियाले एचपिभी खोप सुरक्षित भएको र यसले कुनै नकारात्मक असर नगर्ने बताउँदै सबैलाई निर्धक्क भएर खोप लगाउन आग्रह गरे ।