संघीय संसद्को बर्खे अधिवेशन निर्धारित समयभन्दा डेढ महिना अगावै, भदौ ३१ गते समाप्त भएपछि अब संसदीय समितिहरूको सक्रियता आवश्यक भएको छ। संसद्का मुख्य जिम्मेवारी अब "मिनी संसद्" भनिने संसदीय समितिहरूको काँधमा आएको छ।

प्रतिनिधिसभाको अर्थ समिति र राष्ट्रिय सभाको संघीयता सबलीकरण तथा राष्ट्रिय सरोकार समितिको बैठक बुधबार बोलाइएको छ। दुवै सदनका १४ वटा समिति र दुईवटा संयुक्त समितिहरूले अब समसामयिक विषयमा सरकारलाई जवाफदेही बनाउन, कानुनको कार्यान्वयन अनुगमन गर्न, र सरकारका काममा निगरानी बढाउन भूमिका खेल्नुपर्नेछ।

तर विगतको अभ्यासमा संसद् अधिवेशन नहँुदा समितिहरूको कोरम नपुग्ने समस्या देखिँदै आएको छ। संसदीय समितिको भूमिका प्रभावकारी बनाउन दशैं, तिहार, र छठ पर्वजस्ता महत्त्वपूर्ण राष्ट्रिय पर्वहरूको बीचमा समितिहरूले नियमित रूपमा बैठकहरू सञ्चालन गर्नुपर्ने देखिन्छ।

संसदीय समितिहरूले सरकारका कामहरूको अनुगमन गरी कागजातहरू मागेर मिडियामार्फत् सार्वजनिक गर्ने भएकाले लोकतान्त्रिक प्रक्रियामा यस निकायको विशेष महत्त्व छ।