काठमाडौं – पटक–पटक स्थगित हुँदै आएको नेकपा (माओवादी केन्द्र) को पदाधिकारी बैठक भदौ १९ गते बस्ने भएको छ। उपमहासचिव हरिबोल गजुरेलका अनुसार बैठक केन्द्रीय कार्यालय पेरिसडाँडामा बस्ने भए पनि समय अझै तोकिएको छैन।

गजुरेलले भने, “भदौ १९ गते बैठक बस्ने भनिएको छ, तर समय निश्चित भएको छैन। भोलिपल्टभित्र थाहा होला।” उनका अनुसार बैठकमा समसामयिक राजनीति, स्थायी समितिको निर्णय कार्यान्वयनलगायत एजेन्डामा छलफल हुनेछ।

यसअघि स्थायी समिति बैठकले गरेको निर्णय कार्यान्वयनबारे छलफल गर्न अध्यक्ष पुष्पकमल दाहाल ‘प्रचण्ड’ ले भदौ ३ गते बैठक बोलाएका थिए। तर, प्रतिनिधिसभाकी उपसभामुख इन्दिरा रानामगरलाई पदमुक्त गर्न कांग्रेस र एमालेले हस्ताक्षर अभियान चलाएपछि बैठक छोटो समय बसेर स्थगित भएको थियो।

त्यसपछि भदौ ६ र ८ गतेका लागि तय गरिएको बैठक पनि प्रचण्डले कार्यव्यस्ततालाई कारण देखाउँदै स्थगित गरेका थिए। गत साउन १९ गते सम्पन्न स्थायी समिति बैठकले पार्टीभित्र देखिएका गुट, उपगुट र स्वार्थ समूह विघटन गर्ने निर्णय गरेको थियो।