नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टी छाडेर जानेहरूले गरेको आलोचनाले मूल नेतृत्वलाई प्रभाव नपार्ने बताएका छन् ।

शनिबार पेरिसडाँडामा आयोजित ‘नेपालमा दलित अधिकारको अवस्था, नीतिको विकास र कार्यान्वयनमा चुनौती’ विषयक विचार गोष्ठीमा उनले प्रशिक्षणात्मक सम्बोधन गर्दै भने,
“मूल नेतृत्व र टीम जिवित रहँदासम्म बीचबीचमा उताउला भएर पार्टी छाडेर जानेहरूले जे भने पनि, जे गरे पनि फरक पर्दैन । बकवास गरे पनि फरक पर्दैन । लेनिनले भन्नुभएको छ, जति बकवास गरे पनि फरक पर्दैन ।”

हाल माओवादी छाडेर अलग पार्टी गठन गरेका मोहन बैद्य, डा. बाबुराम भट्टराई, रामबहादुर थापा ‘बादल’, नेत्र विक्रम चन्द ‘विप्लव’ लगायत नेताहरू निरन्तर प्रचण्डप्रति आलोचनात्मक हुँदै आएका छन् । तिनै आलोचनालाई लक्षित गर्दै प्रचण्डले कम्युनिष्ट नेताहरूको दर्शन र विचारको दृष्टान्त प्रस्तुत गर्दै बचाउ गरेका थिए ।

प्रचण्डले क्रान्ति पूर्ण रूपमा जित्न नसकेको स्वीकार गर्दै शान्ति सम्झौता परिस्थितिको बाध्यता भएको उल्लेख गरेका छन् । उनले भने, “यदि हामीले क्रान्ति पूरा जित्न सकेका भए, माथि परेकाहरू तल आउँथे र तल परेकाहरू माथि पुग्थे । जनयुद्धकै कारण उपल्लो जाति वा वर्गलाई समेत उत्पीडित जाति–समुदायलाई सम्मान गर्ने बाध्यता आएको हो।”

उनका अनुसार, युद्धकै कारण उत्पीडित समुदायलाई सम्मान, इज्जत र प्रतिष्ठा दिनुपर्ने बाध्यता सृजना भएको हो । त्यसैगरी, पूर्ण विजय हासिल नगरी सम्झौतामा पुग्नु आन्दोलनको कमजोरी भए पनि त्यसलाई परिस्थितिले थोपरेको भन्दै उनले स्पष्ट पारे । “सम्झौता गर्नु भनेको सम्झौतावादी हुनु होइन,” उनले भने, “कहिलेकाहीँ सम्झौता नगर्दा पूरै लडाइँ हारिने र केही पनि नरहने स्थिति आउँछ । त्यसैले परिस्थितिअनुसार सम्झौता आवश्यक हुन्छ।”

प्रचण्डले परिस्थिति आत्मसात् गर्दै नेतृत्व र समुदायले अगाडि बढ्नुपर्नेमा जोड दिएका छन् ।