राष्ट्रिय स्वतन्त्र पार्टी (रास्वपा) ले रूपन्देही क्षेत्र नम्बर ३ मा आगामी उपनिर्वाचनका लागि डा. लेखजंग थापालाई उम्मेदवार बनाउने घोषणा गरेको छ।

पार्टी उपसभापति डिपी अर्यालले आइतबार पार्टी कार्यालयमा आयोजित पत्रकार सम्मेलनमा यसबारे जानकारी दिएका छन् । रास्वपाको सचिवालय बैठकले ९ जना आकांक्षीमध्ये थापालाई उम्मेदवार घोषणा गरेको हो ।

उपनिर्वाचनका लागि थापासहित सुलभ खरेल, ज्ञानु पौड्याल, जितबहादुर गुप्ता, मधुप्रसाद अर्याल, पार्थिवेन्द्र उपाध्याय, कुसुम महर्जन, पुनमकुमारी अग्रवाल र रचना क्षेत्री आकांक्षी थिए। उम्मेदवार चयनका लागि १२ भदौमा प्राइमरी इलेक्शन गरिएको थियो। अनलाइन भोटिङमा सबैभन्दा बढी भोट पाउने व्यक्तिलाई उम्मेदवार बनाइएको रास्वपाले दाबी गरेको छ।

भैरहवाका डा. लेखजंग वरिष्ठ न्युरोलोजिष्ट, अभियानी र सामाजिक व्यक्तित्वको छव‍ि रहेको छ । उनले १६ वर्षभन्दा बढी समय नेपाली न्युरो साइन्सको विकास र बिरामी उपचारमा बिताएका छन् । उनले पोखराको मणिपाल कलेज अफ मेडिकल साइन्सेजबाट एमबिबिएस, बीपी कोइराला स्वास्थ्य विज्ञान प्रतिष्ठानबाट इन्टरनल मेडिसिनमा एमडी, र कलेज अफ मेडिकल साइन्सेज चितवनबाट डिएम न्युरोलोजी गरेका छन् । साथै, थापा अमेरिकाको हार्वर्ड विश्वविद्यालयबाट ‘सेफ्टी क्वालिटी लिडरसिप एन्ड इन्फर्मेटिभ’ मा स्नातक हुन् ।

डा. थापाका ८० भन्दा बढी अनुसन्धानात्मक पेपरहरू राष्ट्रिय तथा अन्तर्राष्ट्रिय जर्नलमा प्रकाशित भएका छन् । उनी नेपाल स्ट्रोक एसोसिएसनका संस्थापक अध्यक्ष हुन् र उनको टिमले बनाएको राष्ट्रिय स्ट्रोक उपचार व्यवस्थापन प्रोटोकल केही दिनअघि स्वास्थ्य तथा जनसंख्या मन्त्रालयले स्वीकृत गरेको छ ।

निर्वाचन आयोगले रूपन्देही क्षेत्र नम्बर ३ र मनाङमा उपनिर्वाचन कात्तिक १७ गते हुने घोषणा गरेको छ।