सरकारको नेतृत्वको विषयलाई लिएर सैनिक मुख्यालय भद्रकाली बाहिर जेनजी प्रतिनिधि दाबी गर्ने युवाहरूबीच विवाद सुरु भएको छ।

जेनजीहरूको भर्चुअल बैठकले पूर्वप्रधानन्यायाधीश सुशीला कार्कीलाई सरकारको नेतृत्व दिन प्रस्ताव गरेको थियो । भोटिङमार्फत लोकप्रिय मत पाएको आधारमा कार्कीलाई नेतृत्व सुम्पिने तयारी भएको जेनजी समूहले जनाएको छ ।

उनीहरू सोही प्रस्ताव लिएर जंगी अड्डामा वार्ताका लागि जाने तयारीमा थिए । तर, विभिन्न समूहका प्रतिनिधिहरू एकैपटक मुख्यालय पुगेपछि सेनाले उनीहरूलाई गेटमै रोकेको थियो ।

सेनाले माइकिङ गरेरै नाम र नम्बर टिपाएर भोलि आउन आग्रह गरेको जनाएको छ । यसबीच, मुख्यालय बाहिर उपस्थित युवाहरू विभिन्न खेमामा विभाजित भई वादविवाद गरिरहेका छन् ।