कानुन व्यवसायीहरूको छाता संगठन नेपाल बार एसोसिएसनले भर्चुअल बैठकमार्फत संविधानभित्रैबाटै सरकार गठन हुनुपर्ने निष्कर्ष निकालेको छ।

पूर्वमहान्यायाधिवक्ता एवं वरिष्ठ अधिवक्ता दिनमणि पोखरेलले जेनजी पुस्ताले अन्योलता महसुस गरिरहेको बेला विकल्प र सुझाव दिने वातावरण आवश्यक रहेको बताएका थिए । उनले संविधानभन्दा बाहिर गएर प्रधानमन्त्रीको खोजी गर्नु उपयुक्त नरहेको र संवैधानिक सङ्कटबाट मुलुकलाई बाहिर ल्याउन बारले भूमिका निर्वाह गर्नुपर्ने बताएका छन् ।

वरिष्ठ अधिवक्ता गोविन्द बन्दीले जेनजी आन्दोलन किन आयो र यसको मूल कारण के–के हुन् भन्नेबारे स्पष्ट अध्ययन आवश्यक रहेको बताएका छन् । कानुन व्यवसायी ताराकुमार श्रेष्ठले जेनजीको भावनालाई सम्बोधन गर्ने विज्ञप्ति जारी हुनुपर्ने र आन्दोलन भ्रष्टाचार र बेथितिको विरुद्ध रहेको कुरा नेपाल बारले बिर्सन नहुने बताए ।

वरिष्ठ अधिवक्ता बाबुराम जोशीले जेनजी आन्दोलन संविधान विरोधी नभई भ्रष्टाचार नियन्त्रण र पूर्ण कार्यकाल भएको सरकार कायम राख्ने प्रयास भएको बताए । संविधानको धारा ७३(३) अनुसार नयाँ सरकार गठन असम्भव भए संसद्मा सदस्यभित्रैबाट प्रधानमन्त्री चयन गर्नुपर्ने सुझाव पनि उनले दिएका छन् ।

कानुन व्यवसायी सुरेन्द्रकुमार महतोले भने, “हालको अवस्था विकराल र असामान्य छ । संविधानअनुसार सरकार बनाउने हो भने शेरबहादुर देउवा प्रधानमन्त्री बन्नुपर्ने हुन्छ । संघीय लोकतान्त्रिक गणतन्त्रात्मक बहुदलीय शासन प्रणाली कायम रहनै पर्छ।”