नेकपा एमालेका सचिव योगेश भट्टराईले पार्टी पुनर्गठनको अपिल गरेका छन्। बिहीबार सामाजिक सञ्जाल फेसबुकमार्फत जारी भिडियो सन्देशमा भट्टराईले नयाँ पुस्ताको भावना र मागलाई अहिलेकै राजनीतिक नेतृत्व, संरचना र मनोविज्ञानबाट सम्बोधन गर्न कठिन भएको उल्लेख गरेका छन् ।
उनले भने, “२३ भदौले दिएको सन्देश ग्रहण गर्नु र त्यसमा अभिव्यक्त भावनाको वस्तुगत सम्मान गर्दै राज्य, समाज र पार्टी संरचनामा बहुआयमिक रुपान्तरण गर्नु अनिवार्य र पहिलो सर्त हो।”
भट्टराईले विगतका पार्टी पुनर्गठनका दृष्टान्तसमेत पेश गर्दै पुनर्गठन र रूपान्तरणको बहसलाई वर्तमान नेतृत्वप्रतिको प्रहार वा उत्तेजनापूर्ण गतिविधि जस्तो रूपमा नबुझ्न आग्रह गरेका छन्।
उनी थप्छन्, “पार्टी र आन्दोलनको पुनर्गठन गरिरहँदा इतिहासको बेवास्ता वा अपमान कदापी गर्नु हुँदैन। पार्टीका नेताहरू जो आज नेतृत्वमा हुनुहुन्छ, लामो समय हामी पनि उहाँहरूसँगै थियौं। त्यसैले म यो बेला भन्छु– उहाँहरूको सम्मानसहित पुनर्गठन।”
तपाईको प्रतिक्रिया दिनुहोस