नेपाल कम्युनिष्ट पार्टी (एमाले) ले आगामी मङ्सिर २७ देखि २९ गतेसम्म हुने ११औँ राष्ट्रिय महाधिवेशनका लागि देशभरि प्रतिनिधि छनोट कार्य सम्पन्न गरेको छ । करिब २,२०० प्रतिनिधि छनोट गर्ने क्रममा देशैभरि उत्साह देखिए पनि मोरङ र धनकुटा लगायतका केही जिल्लामा छिटपुट विवाद, झडप र तोडफोड समेतका घटनाहरू भएका छन्।

केन्द्रीय प्रचार तथा प्रकाशन विभाग प्रमुख राजेन्द्र गौतमका अनुसार, महाधिवेशन प्रतिनिधि छनोटको काम शान्तिपूर्ण रूपमा सम्पन्न भएको छ, यद्यपि अपवादका रूपमा केही स्थानमा निर्वाचनको क्रममा विवाद देखिएको छ।

गौतमका अनुसार, धेरैजसो कमिटीमा सर्वसम्मत प्रतिनिधि चयन भए पनि सहमति नभएका क्षेत्रहरूमा लोकतान्त्रिक प्रक्रियाअनुसार मतदान भएको थियो। सङ्घीय निर्वाचन क्षेत्रबाट खुला, महिला, युवा र दलितसहित करिब २ हजार प्रतिनिधि छनोट भएका छन्। छनोट भएका प्रतिनिधिको विवरण मङ्सिर १५ गतेभित्र पार्टी केन्द्रीय कार्यालयमा पठाइसक्न निर्देशन दिइएको छ।

नेतृत्वको द्वन्द्व प्रतिनिधि छनोटमा

महाधिवेशनमा अध्यक्ष केपी शर्मा ओली र वरिष्ठ उपाध्यक्षका आकांक्षी ईश्वर पोखरेल बिच नेतृत्वका लागि प्रतिस्पर्धा हुने निश्चित भएसँगै प्रतिनिधि छनोटमा समेत गुटगत द्वन्द्वको गन्ध देखिएको छ।

विराटनगरको पाञ्चालीस्थित पार्टी कार्यालयमा ओली पक्ष र पोखरेल पक्षबिच झडप र हात हालाहाल भएको थियो। सर्वसम्मत हुन नसकेपछि निर्वाचनमा डबल मत हालेको आरोपलाई लिएर विवाद बढेको थियो, यसले गर्दा केहीबेर मतदान स्थगित समेत भएको थियो ।

कोशी प्रदेशको धनकुटामा प्रतिनिधि चयनमा एकलौटी गरिएको भन्दै असन्तुष्ट समूहले निर्वाचन बहिस्कार गरेको थियो । बहिस्कार गर्नुअघि निर्वाचन बुथमा तोडफोड समेत भएको बताइएको छ । यहाँ राजेन्द्र राई (ओली पक्षधर) र इन्द्रमणी पराजुली (विद्या पक्षधर) समूहबिच विवाद भएको थियो।

एमालेको ११औँ महाधिवेशन भक्तपुरको सल्लाघारीमा उद्घाटन सत्र र भृकुटीमण्डपमा बन्द सत्र सञ्चालन गर्ने तयारी छ। महाधिवेशनले आगामी पाँच वर्षका लागि नयाँ नेतृत्व चयन गर्नेछ।

पार्टीका कुल ६ लाख ६७ हजार ६३० सङ्गठित सदस्य मध्येबाट विभिन्न क्लस्टर (प्रतिनिधिसभा निर्वाचन क्षेत्र, प्रदेश, विशेष जिल्ला, जनसङ्गठन, तथा केन्द्रीय कमिटीका पदेन सदस्य) को प्रतिनिधित्व सुनिश्चित गरिएको छ।