राष्ट्रिय स्वतन्त्र पार्टी (रास्वपा) ले रौतहटमा चुनावी प्रचारका क्रममा प्रयोग गरिएको सवारी साधनको ठक्करबाट चार वर्षीया बालिकाको मृत्यु भएको घटनालाई अत्यन्त गम्भीर रूपमा लिएको जनाएको छ । शुक्रबार महामन्त्री कवीन्द्र बुर्लाकोटीले विज्ञप्ति जारी गर्दै घटनाको वस्तुनिष्ठ छानबिनका लागि स्थानीय प्रशासनलाई पूर्ण सहयोग गर्ने प्रतिबद्धता व्यक्त गरेका छन् ।

“रौतहटमा चुनावी अभियानका क्रममा प्रयोग गरिएको सवारी साधनको ठक्करबाट चार वर्षीया बालिकाको असामयिक निधन भएको खबरले राष्ट्रिय स्वतन्त्र पार्टी स्तब्ध र मर्माहत भएको छ” विज्ञप्तिमा भनिएको छ । पार्टीले मृतक बालिकाप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ ।

पार्टीले यस घटनालाई अत्यन्त गम्भीरताका साथ लिएको छ । घटनाको निष्पक्ष र वस्तुनिष्ठ छानबिनका लागि स्थानीय प्रशासनलाई पूर्ण सहयोग गर्न हामी प्रतिबद्ध रहने विज्ञप्तिमा भनिएको छ ।

कानुनी प्रक्रिया अघि बढाउन र पीडित परिवारलाई न्याय दिलाउन कुनै कसर बाँकी नराखिने महामन्त्री बुर्लाकोटीले स्पष्ट पारेका छन् । साथै पीडित परिवारलाई सम्भव भएसम्म राहत र सहयोग उपलब्ध गराउन पार्टीले आवश्यक पहल गरिरहेको जानकारी पनि दिएका छन् ।

उनले चुनावी अभियानमा प्रयोग हुने सवारी साधनको परिचालनमा उच्च सतर्कता अपनाउन तथा सुरक्षा संवेदनशीलतालाई प्राथमिकतामा राख्न पार्टीपङ्ति र उम्मेदवारलाई कडा निर्देशन दिएको उल्लेख गरेका छन् ।

बिहीबार दिउँसो साढे दुई बजे रौतहटको इशनाथ नगरपालिका–३, मठिया टोलमा रास्वपाले चुनावी प्रचारमा प्रयोग गरेको बा १५ च ४२४४ नम्बरको कारको ठक्करबाट चार वर्षीया अल्फा खातुनको मृत्यु भएको थियो । सो गाडी रौतहट–२ का रास्वपाका उम्मेदवार सागिर आलमले प्रयोग गरेका थिए ।

दुर्घटनापछि चालक फरार रहेकाले उनको खोजी कार्य भइरहेको प्रहरीले जनाएको छ ।