प्रधानमन्त्री वालेन्द्र (बालेन) शाहले आज विश्वविद्यालय तथा प्रतिष्ठानका उपकुलपतिहरूसँग उच्चस्तरीय छलफल गर्ने भएका छन्। प्रधानमन्त्री तथा मन्त्रिपरिषद्को कार्यालयमा मध्याह्न १२ बजे बस्ने बैठकमा प्रधानमन्त्री कुलपति रहने ११ विश्वविद्यालय र सात प्रतिष्ठानका उपकुलपतिहरूलाई बोलाइएको प्रधानमन्त्रीको सचिवालयले जनाएको छ।
बैठकमा विश्वविद्यालय र प्रतिष्ठानहरूले भोगिरहेका समसामयिक समस्या, सुधारका उपाय तथा तत्काल समाधान गर्न सकिने विषयमा केन्द्रित छलफल हुने बताइएको छ। उच्च शिक्षा क्षेत्रमा देखिएका चुनौती र सुधारका सम्भावनाबारे ठोस निष्कर्ष निकाल्ने उद्देश्यले बैठक आयोजना गरिएको हो।
छलफलमा त्रिभुवन विश्वविद्यालय, काठमाडौं विश्वविद्यालय, पूर्वाञ्चल विश्वविद्यालय, पोखरा विश्वविद्यालय र लुम्बिनी बौद्ध विश्वविद्यालयका उपकुलपतिहरू सहभागी हुनेछन्। साथै नेपाल संस्कृत विश्वविद्यालय, सुदूरपश्चिमाञ्चल विश्वविद्यालय र मध्यपश्चिमाञ्चल विश्वविद्यालयका उपकुलपतिहरू पनि उपस्थित रहनेछन्।
त्यसैगरी कृषि तथा वनविज्ञान विश्वविद्यालय, राजर्षि जनक विश्वविद्यालय र शहीद दशरथ चन्द स्वास्थ्य विज्ञान विश्वविद्यालयका उपकुलपतिहरूसँग प्रधानमन्त्री शाहले संवाद गर्नेछन्। नेपाल विज्ञान तथा प्रविधि प्रज्ञा प्रतिष्ठान (नास्ट), चिकित्सा विज्ञान राष्ट्रिय प्रतिष्ठान, पाटन स्वास्थ्य विज्ञान प्रतिष्ठान र बीपी कोइराला स्वास्थ्य विज्ञान प्रतिष्ठानका उपकुलपतिहरू पनि बैठकमा सहभागी हुनेछन्।
यस्तै, कर्णाली स्वास्थ्य विज्ञान प्रतिष्ठान, पोखरा स्वास्थ्य विज्ञान प्रतिष्ठान र राप्ती स्वास्थ्य विज्ञान प्रतिष्ठानका उपकुलपतिहरूसँग पनि प्रधानमन्त्रीले छलफल गर्ने सचिवालयले जनाएको छ।
तपाईको प्रतिक्रिया दिनुहोस