आगामी असारमा हुने पहिलो ऐतिहासिक राष्ट्रिय महाधिवेशनको पूर्वसन्ध्यामा राष्ट्रिय स्वतन्त्र पार्टी (रास्वपा) को जिल्ला अधिवेशन आजदेखि देशव्यापी रूपमा सुरु भएको छ। महाधिवेशनका लागि प्रतिनिधि छनोट र नेतृत्व चयन गर्न रास्वपाले आज र भोलि (शनिबार र आइतबार) दुई दिन जिल्ला अधिवेशन गर्न लागेको हो।

रास्वपाले पछिल्लोपटक डोल्पामा जिल्ला तदर्थ समिति गठन गरेसँगै देशका सबै ७७ वटै जिल्लामा आफ्नो साङ्गठनिक संरचना विस्तार गरिसकेको छ। यद्यपि, भौगोलिक प्रतिकूलता वा विशिष्ट साङ्गठनिक अवस्थाका कारण हिमाली जिल्लाहरू मनाङ र मुस्ताङमा भने यसपटक जिल्ला अधिवेशन नगरिने पार्टीले जनाएको छ।

राष्ट्रिय स्वतन्त्र पार्टीको पहिलो ऐतिहासिक राष्ट्रिय महाधिवेशन आगामी असार ७, ८ र ९ गते चितवनमा हुने तय भइसकेको छ।

जिल्ला अधिवेशनहरू सकिएलगत्तै पार्टीको सम्पूर्ण ध्यान चितवन महाधिवेशनमा केन्द्रित हुने र यसले रास्वपाको आगामी वैचारिक तथा साङ्गठनिक दिशा तय गर्ने नेताहरूले बताएका छन्।