नेकपा एमालेका अध्यक्ष केपी शर्मा ओलीले दुईतिहाइको बहुमतसहित सत्तामा रहेको कम्युनिस्ट पार्टीलाई चक्नाचुर पार्नेहरू र कांग्रेससँग गठबन्धन गर्न जानेहरूसँग वाम एकता हुन नसक्ने स्पष्ट पारेका छन् ।

बागमती प्रदेशस्तरीय वडाध्यक्ष प्रशिक्षण कार्यक्रममा बोल्दै अध्यक्ष ओलीले केही नेताहरूले वाम एकताको कुरा गरिरहे पनि त्यसको व्यवहारिक सम्भावना नरहेको बताए । “दुईतिहाइको कम्युनिस्ट पार्टीलाई ध्वस्त पारेर कांग्रेससँग बिन्तीपत्र चढाउन जानेहरूसँग के को वाम एकता ?” ओलीले प्रश्न गरे ।

उनले पार्टीलाई कमजोर बनाउने, टर्च बालेर खोज्नुपर्ने अवस्थामा पुर्‍याउने र "भित्तामा पुर्‍याउँछु" भन्ने अभिव्यक्ति दिनेहरूलाई समावेश गरेर वाम एकता असम्भव हुने बताए । माओवादी केन्द्रका अध्यक्ष पुष्पकमल दाहाल ‘प्रचण्ड’लाई लक्षित गर्दै उनले अफवाह फैलाउने नेतृत्वसँग पनि आफू सहमत नभएको प्रस्ट पारे।

“केपी ओलीको कम्बोडियामा लगानी छ भनेर अफवाह फैलाउने प्रचण्ड हुन्। अफवाह फैलाउनेहरूसँग, एमालेलाई धुलो चटाउने भनिरहेका पात्रहरूसँग के को वाम एकता?” भन्दै ओलीले प्रचण्ड नेतृत्वमाथि कटाक्ष गरे।