अमेरिकी सरकारले न्युयोर्कमा हुने संयुक्त राष्ट्रसंघको महासभामा सहभागी हुन इरानी अधिकारीहरूलाई भिसा उपलब्ध गराएको छ। दुई देशबीचको तनावपूर्ण सम्बन्ध र युद्ध सातौँ महिनामा प्रवेश गरिरहेको संवेदनशील समयमा अमेरिकाले इरानी प्रतिनिधिमण्डललाई संयुक्त राष्ट्रसंघीय बैठकमा सहभागी हुने अनुमति दिएको हो।

अमेरिकी स्वीकृति पाएको यस उच्चस्तरीय प्रतिनिधिमण्डलमा इरानी राष्ट्रपति मसुद पेजेस्कियान र विदेशमन्त्री अब्बास अराघ्चीसमेत सहभागी हुने बीबीसीले जनाएको छ।

अमेरिकी विदेश मन्त्रालयका प्रवक्ताले बिहीबार यस निर्णयको औपचारिक पुष्टि गर्दै प्रतिनिधिमण्डलमाथि कडा भ्रमण प्रतिबन्धहरू लागु हुने स्पष्ट पारेका छन्। उनका अनुसार इरानी प्रतिनिधिहरूले अमेरिकामा रहँदा केही निश्चित अमेरिकी उत्पादनहरू तथा विलासी वस्तुहरू खरिद गर्न पाउने छैनन्। गत वर्षको तुलनामा यस पटक इरानी प्रतिनिधिमण्डलको आकार भने सानो रहेको छ।

इरान र अमेरिकाबीचको युद्ध रोकिने वा साम्य हुने कुनै पनि सङ्केत नदेखिएको बेला यो निर्णय बाहिर आएको छ। गत फेब्रुअरीमा सुरु भएको यस द्वन्द्वका कारण विश्व बजारमा इन्धन (तेल र ग्यास) को मूल्यमा भारी वृद्धि भएको छ भने यसको प्रभाव छिमेकी राष्ट्रहरूसम्म फैलिसकेको छ।

संयुक्त राष्ट्रसंघको आयोजक तथा आतिथ्य गर्ने देशको रूपमा आफ्नो अन्तर्राष्ट्रिय दायित्व पूरा गर्दै यो अनुमति दिइएको अमेरिकी पक्षको स्पष्टोक्ति छ।