रूसले संयुक्त राज्य अमेरिकासँग वार्ताका लागि वार्ता टोली गठन गर्न थालेको क्रेमलिनका प्रवक्ता दिमित्री पेस्कोभले बिहीबार जानकारी दिएका छन् । उनका अनुसार युक्रेन संकट र अन्य द्विपक्षीय विषयमा छलफल गर्न वार्ता टोली तयार पार्ने प्रक्रिया अघि बढाइएको छ।
रूसी राष्ट्रपति भ्लादिमिर पुटिन र अमेरिकी राष्ट्रपति डोनाल्ड ट्रम्पबीच छिट्टै भेटवार्ता हुन सक्ने संकेत पेस्कोभले दिएका छन् । “यस्तो बैठक चाँडै हुन जरुरी छ। राष्ट्रप्रमुखहरूबीच छलफल गर्नुपर्ने धेरै विषयहरू छन्,” उनले भने । पेस्कोभका अनुसार पछिल्लो टेलिफोन कुराकानीमा मुख्य विषयहरू संक्षिप्त रूपमा उठाइएका थिए, जसको विस्तृत छलफल प्रत्यक्ष भेटमा हुन आवश्यक छ ।
युक्रेन मुद्दामा अहिले सम्म ठोस वार्ता नभएको उनले बताए । “कार्यस्तरमा कुनै ठोस सम्पर्क स्थापित भएको छैन । तर, नेताहरूको राजनीतिक इच्छाअनुसार प्रक्रिया अघि बढ्नेछ,” उनले भने । बुधबार ९० मिनेट लामो टेलिफोन वार्तामा पुटिन र ट्रम्पले युक्रेन संकट, द्वन्द्वको शान्तिपूर्ण समाधान, मध्यपूर्व र द्विपक्षीय आर्थिक सम्बन्धबारे छलफल गरेका थिए ।
तपाईको प्रतिक्रिया दिनुहोस