अमेरिकी राष्ट्रपति डोनाल्ड ट्रम्पले टेस्ला तथा स्पेसएक्सका प्रमुख एलन मस्कमाथि कडा टिप्पणी गर्दै ‘उनले सोच्ने शक्ति गुमाएको’ दाबी गरेका छन् । विश्वका दुई शक्तिशाली र चर्चित अर्बपतिहरूबीच सार्वजनिक रूपमा बढ्दै गएको टकरावले अमेरिकी राजनीति र अर्थतन्त्रमा थप तनाव उत्पन्न गराएको विश्लेषण गरिएको छ।

ह्वाइट हाउस स्रोतका अनुसार राष्ट्रपति ट्रम्पले एलन मस्कसँग वार्ता गर्ने सोच त्याग गरिसकेको छन् । एयर फोर्स वानमार्फत न्यूजर्सीस्थित गल्फ क्लब जाँदै गर्दा पत्रकारहरूसँग कुरा गर्दै ट्रम्पले भने, “म चीन, रुस, इरानसँगको छलफलमा व्यस्त छु । म मस्कबारे सोचिरहेको छैन । म उनको राम्रो कामको लागि शुभकामना दिन्छु ।”

तर मस्कबारेको टिप्पणी यत्तिमा मात्रै सीमित भएन । एबीसीसँगको अन्तर्वार्तामा ट्रम्पले भने, “तपाईंको मतलब सोच्ने शक्ति गुमाएको मान्छे ?” फक्स न्यूजसँग थप्दै उनले मस्कले वास्तवमै आफ्नो ‘सोच्ने शक्ति गुमाएका’ आरोप लगाए ।

यसअघि मस्कले ट्रम्पको खर्च विधेयकलाई ‘घृणित’ भनेपछि राष्ट्रपति ट्रम्पले ओभल अफिसबाट मस्कप्रति गहिरो निन्दा व्यक्त गर्दै टिप्पणी गरेका थिए । ट्रम्पको भनाइले मस्कसँगको सम्बन्ध पूर्णतः चिसिएको संकेत दिएको छ ।

मस्कले सरकारसँगको सम्झौता अन्तर्गत चलिरहेको अर्बौं डलरको रकेट तथा स्याटेलाइट कार्यक्रम डिपार्टमेन्ट अफ गभर्नमेन्ट एफिसियन्सी (डिओजिई) मार्फत लागत कटौतीको नेतृत्व गरिरहेका थिए । तर हालै मस्कले चार महिनापछि उक्त भूमिकाबाट राजीनामा दिने निर्णय गरेका छन् ।

ट्रम्प प्रशासनले अब मस्कको स्पेसएक्ससँग भएका ठूला सरकारी सम्झौताहरूको पुनरवलोकन गर्ने तथा बन्द गर्ने संकेत दिएको छ । “यो धेरै पैसा हो, धेरै अनुदान हो । हामी हेर्छौं, यदि यो देशको लागि सही हुन्छ भने मात्रै अघि बढाइनेछ,” ट्रम्पले भने ।

सामाजिक सञ्जालमा बढ्दो शत्रुता कम गर्न मस्कले अन्तरिक्ष यात्रीलाई अन्तरिक्ष केन्द्रसम्म पठाउने स्पेसएक्सको ‘ड्रागन’ अन्तरिक्ष यान परियोजना रद्द गर्ने चेतावनी भने शुक्रबार फिर्ता लिएका छन् ।

विश्लेषकहरूले यस विवादलाई अर्बपतिहरूको व्यक्तिगत तिक्तता मात्र नभई, आगामी चुनावी रणनीति र सरकारी साझेदारीमा गम्भीर प्रभाव पार्ने संकेतको रूपमा लिएका छन् ।