कानानास्किस (क्यानडा) — इजरायल र इरानबीच चुलिएको तनावले सात औद्योगिक राष्ट्रहरूको समूह (जी–सेभेन) को बैठकमा पनि गहिरो असर पारेको छ । अमेरिकाका पूर्वराष्ट्रपति डोनाल्ड ट्रम्पले क्यानाडाको कानानास्किसमा आयोजित जी–सेभेन बैठकको औपचारिक कार्यसूची सकिनुअघि नै बैठक त्यागेर अमेरिका फर्किएका छन् ।

ह्वाइटहाउसले मिडिल इस्टमा बढ्दो अस्थिरताका कारण ट्रम्प आकस्मिक रूपमा स्वदेश फर्किएको जानकारी दिएको छ । यद्यपि, इजरायल वा इरानको नाम स्पष्ट रूपमा उल्लेख नगरिएको ह्वाइटहाउसको भनाइ अन्तर्राष्ट्रिय सञ्चारमाध्यमहरूको दृष्टिमा अर्थपूर्ण देखिएको छ ।

ट्रम्पले एक्स (पूर्व ट्विटर) मा लेख्दै इरानलाई लक्षित गर्दै भनेका छन्, “इरानले परमाणु सम्झौतामा हस्ताक्षर गर्नुपर्छ । इरानसँग न्युक्लियर हतियार रहन सक्दैन । मैले यो कुरा पटक–पटक स्पष्ट पारेको छु ।”

जी–सेभेन बैठकको पहिलो दिन सदस्य राष्ट्रहरूले इजरायल–इरान युद्धविरामका लागि संयुक्त धारणा बनाउने प्रयास गरेका थिए । तर उक्त प्रयास अमेरिकी असहयोगका कारण निष्कर्षमा पुग्न सकेन । अन्तर्राष्ट्रिय सञ्चारमाध्यमका अनुसार ट्रम्पले जी–सेभेनको संयुक्त वक्तव्यमा हस्ताक्षर गर्न नमानेपछि सहमति प्रक्रिया अलपत्र परेको हो ।

विश्लेषकहरूका अनुसार मिडिल इस्टको द्वन्द्वले अब विश्व राजनीति र कूटनीतिक निकायहरूमा गहिरो ध्रुवीकरण ल्याउने सम्भावना बढेको छ । जी–सेभेनजस्तो प्रभावशाली फोरममा पनि साझा दृष्टिकोण बनाउन सकस देखिनु विश्वशक्ति राष्ट्रहरूबीच गम्भीर मतभेदको संकेत मानिएको छ ।