दुबईका शासक परिवारकी सदस्य राजकुमारी शेखा महरा मोहम्मद रसिद अल मकतौम फेरि एकपटक अन्तर्राष्ट्रिय मिडियामा छाएकी छन्।

गत वर्ष मात्रै इन्स्टाग्राममार्फत श्रीमानसँग सम्बन्धविच्छेदको सनसनीपूर्ण घोषणा गरेर सबैलाई चकित पारेकी महरा, अहिले अमेरिकी र्‍यापर फ्रेन्च मोन्टानासँग इन्गेजमेन्टमा बाँधिएको समाचारले फेरि हलचल मच्चाएको छ।

३१ वर्षीया राजकुमारी र ४० वर्षीय मोन्टानाले सन् २०२५ को जुनमा पेरिस फेसन विकको विशेष कार्यक्रममा औपचारिक रूपमा इन्गेजमेन्ट गरेको खबर बाहिरिएको छ। गत वर्षदेखि नजिकिएका यी दुवैबीचको सम्बन्ध सुरुमा अनुमानको भरमा मात्रै चर्चामा थियो । तर, पेरिस फेसन विकमा उनीहरूले हात समातेर प्रेम सार्वजनिक गरेपछि उनीहरूको प्रेमकथा विश्व सामु खुलेर आएको हो ।

पहिलो भेटदेखि प्रेमसम्म

राजकुमारी महरा र फ्रेन्च मोन्टानाबीच २०२४ को अन्त्यतिर भेट भएको मानिन्छ। त्यसपछि महराले मोन्टानालाई दुबई भ्रमण गराएकी थिइन् र दुवैका तस्बिरहरू सामाजिक सञ्जालमा व्यापक सेयर भए । कहिले दुबई र मोरक्कोका आकर्षक रेस्टुरेन्टहरूमा भोजन, कहिले मस्जिदमा भ्रमण, कहिले पेरिसको Pont des Arts ब्रिजमा रमाइलो गरेका फोटो शेयर लगायतलेे दुवैको सम्बन्धलाई थप चर्चित बनायो ।

महराको जीवनमा यो नयाँ अध्याय सुरु हुनुको पृष्ठभूमि भने उतारचढावले भरिएको छ । उनले २०२३ मेमा शेख मना बिन मोहम्मद बिन रसिद बिन मना अल मकतूमसँग विवाह गरेकी थिइन् । उनीहरूको एक छोरी समेत छ । तर, विवाह लामो समय टिक्न सकेन ।
गत वर्ष महराले इन्स्टाग्राममा श्रीमानलाई अन्य महिलासँग सम्बन्ध राखेको आरोप लगाउँदै सनसनीपूर्ण स्टाटस लेखेकी थिइन् :-

“मेरो श्रीमान्, तिमी अन्य महिलासँग व्यस्त भएकाले म तिमीलाई सम्बन्धविच्छेद गर्छु, तिमीलाई सम्बन्धविच्छेद गर्छु, तिमीलाई सम्बन्धविच्छेद गर्छु । आफ्नो ख्याल राख । तिम्रो पूर्व पत्नी।”

यो पोस्ट भाइरल बनेर चर्चाको शिखरमा पुगेको थियो । सम्बन्धविच्छेदपछि महराले आफ्नो ब्राण्ड “Maha M1” अन्तर्गत ‘Divorce’ नामक परफ्युम समेत लन्च गरेकी थिइन्, जसले फेरि एकपटक उनको आत्मनिर्भर र साहसी व्यक्तित्वलाई चर्चामा ल्याएको थियो ।

राजकुमारी महरा शाही परिवारकी सदस्य मात्र होइन, एक शिक्षित र आधुनिक सोच भएकी महिला पनि हुन्। उनले बेलायतमा अन्तर्राष्ट्रिय सम्बन्ध विषयमा अध्ययन गरेकी छिन् । साथै, दुबई सरकार अन्तर्गत मोहम्मद बिन रसिद प्रशासनबाट पनि योग्यता प्राप्त गरेकी छन् ।

फ्रेन्च मोन्टाना : गीत, जीवन र परोपकार

फ्रेन्च मोन्टाना, जसको वास्तविक नाम करिम खरबुस हो, विश्वसंगीत क्षेत्रमा चर्चित नाम हो। उनका “Unforgettable” र “No Stylist” जस्ता हिट गीतहरूले उनलाई अन्तर्राष्ट्रिय स्टार बनाएको छ। उनले सन् २००७ देखि २०१४ सम्म पत्नी नदीम खरबुससँग विवाह बन्धनमा बाँधिएका थिए, जसबाट उनको १६ वर्षीय छोरा क्रुज खरबुस छन्। संगीत मात्र होइन, मोन्टाना परोपकारी कार्यका लागि पनि चिनिन्छन्। उनले युगान्डा र उत्तर अफ्रिकामा स्वास्थ्य सेवा र शिक्षा परियोजनामा लगानी गर्दै आएका छन्।