पोर्चुगल र हंगेरी पठाइदिन्छु भन्दै ठगी गर्ने दुई जना पक्राउ
वैदेशिक रोजगारीको प्रलोभन देखाएर पोर्चुगल र हंगेरी पठाइदिन्छु भन्दै ठगी गर्ने दुई जना व्यक्तिलाई प्रहरीले पक्राउ गरेको छ।
पक्राउ पर्नेमा भक्तपुर, सूर्यविनायक नगरपालिका–३ बसोबास गर्दै आएका बारा, निजगढ नगरपालिका–१२ निवासी ४१ वर्षीय राम बहादुर थिङ र भक्तपुर, मध्यपुर थिमी नगरपालिका–३ बस्ने रामेछाप नगरपालिका–३ निवासी ३७ वर्षीय चन्द्र बहादुर सुवेदी रहेका छन्।
राम बहादुरले पोर्चुगल पठाइदिने भन्दै ६ जना पीडितबाट २९ लाख रुपैयाँ लिएको तथा चन्द्र बहादुरले हंगेरी पठाइदिने भन्दै एकजनाबाट २ लाख ५० हजार रुपैयाँ असुलेर सम्पर्कबिहीन भएको उजुरीका आधारमा उनीहरूलाई पक्राउ गरिएको हो।
उक्त उजुरीको आधारमा खटिएको काठमाडौं उपत्यका अपराध अनुसन्धान कार्यालय, टेकुबाट खटिएको टोलीले राम बहादुरलाई मंगलबार र चन्द्र बहादुरलाई बुधबार भक्तपुरको मध्यपुर थिमी क्षेत्रबाट पक्राउ गरेको हो।
पक्राउ परेकाहरूमाथि आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल काठमाडौं पठाइएको प्रहरीले जनाएको छ।
तपाईको प्रतिक्रिया दिनुहोस