वैदेशिक रोजगारीमा आकर्षक तलबको प्रलोभन देखाएर विभिन्न देश पठाइदिने बाहनामा लाखौँ रुपैयाँ ठगी गर्ने चार जनालाई प्रहरीले पक्राउ गरेको छ।

पक्राउ पर्नेहरूमा रौतहट घर भई हाल काठमाडौं महानगरपालिका-२८ बस्ने ४६ वर्षीय एम.डी. खुर्सिद आलम नेपाली, नवलपरासी पश्चिम घर भई ललितपुरको गोदावरी नगरपालिका-२ बस्ने ३३ वर्षीय भुप नारायण चौधरी, सिराहा घर भई ललितपुरको महालक्ष्मी नगरपालिका-८ बस्ने ३४ वर्षीय बसन्त कुमार सिंह र संखुवासभा घर भई काठमाडौंको बूढानीलकण्ठ नगरपालिका-९ बस्ने ४२ वर्षीय रस्तमान राई रहेका छन्। 

पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरी टोलीले एम.डी. खुर्सिद आलमलाई काठमाडौं-२८ बाट र भुप नारायणलाई काठमाडौं-२ बाट बिहीबार पक्राउ गरेको थियो। त्यस्तै, बसन्त कुमारलाई ललितपुरको महालक्ष्मी-५ बाट र रस्तमानलाई ललितपुर महानगरपालिका-८ बाट शुक्रबार नियन्त्रणमा लिइएको हो।

पक्राउ परेका सबैलाई थप अनुसन्धान तथा कारबाहीका लागि वैदेशिक रोजगार विभाग, ताहाचल, काठमाडौं पठाइएको प्रहरीले जनाएको छ।