काठमाडौंको तीनकुनेमा भएको हिंसात्मक राजावादी प्रदर्शनमा संलग्न भएको आरोपमा पक्राउ परेका दुर्गा प्रसाईंका दुई बडिगार्ड दीपक खड्का र रामकुमार धिमालसहित ३४ जनाविरुद्ध मुद्दा नचल्ने निर्णय भएको छ ।

तीनकुनेमा १५ चैतमा भएको प्रदर्शनमा संलग्न भएको अभियोगमा उनीहरूलाई जिल्ला प्रहरी परिसर काठमाडौंले अनुसन्धान गरी मुद्दा चलाउने सिफारिस गरेको थियो । तर जिल्ला सरकारी वकिलको कार्यालयले उनीहरूमाथि वस्तुनिष्ठ आधार र प्रमाण नपाइएको भन्दै अभियोजन नगर्ने निर्णय गरेको हो ।

सरकारी वकिलको निर्णयसँगै खड्का, धिमाललगायत ३४ जना आइतबार साँझ हिरासतबाट रिहा भएका छन् ।

उक्त प्रदर्शनमा संलग्न भन्दै पक्राउ परेका अन्य व्यक्तिहरूविरुद्ध भने काठमाडौंमा अहिले मुद्दा दर्ता भइसकेको छ र प्रतिवादीहरूको बयान प्रक्रिया चलिरहेको छ ।