सर्लाही – प्रहरीले कटुवा पेस्तोलसहित दुई युवकलाई नियन्त्रणमा लिएको छ। पक्राउ पर्नेमा रामनगर गाउँपालिका–७ सिसौट टोलका २५ वर्षीय किशन महरा र बागमती नगरपालिका–४ जिरायत टोलका १८ वर्षीय श्याम महरा रहेका छन्।

जिल्ला प्रहरी कार्यालय सर्लाहीका अनुसार भदौ ११ गते दिउँसो करिब ३ बजे भारतको सोनवर्षाबाट मलंगवातर्फ बीआर ०६ डीएम ९५२३ नम्बरको मोटरसाइकलमा आएका किशन महरालाई प्रहरीले शंकास्पद ठानी नियन्त्रणमा लिई सोधपुछ गरेको थियो।

प्राथमिक अनुसन्धानका क्रममा किशनले आफूले बोक्ने गरेको हतियार श्याम महरालाई राख्न दिएको स्वीकार गरेका थिए। सोही बयानका आधारमा प्रहरीले श्यामलाई समेत नियन्त्रणमा लिएर बागमती नगरपालिका–१२ स्थित बागमती नदीको बगरबाट नलकटुवा पेस्तोल बरामद गरेको जनाएको छ।

प्रहरीका अनुसार दुवैजनामाथि हातहतियार तथा खरखजाना मुद्दा दर्ता गरी सर्लाही जिल्ला अदालतबाट बिहीबार १० दिनको म्याद थप गरिएको छ। उनीहरूविरुद्ध थप अनुसन्धान भइरहेको प्रहरीले जनाएको छ।