राज्यले आफ्ना मागप्रति कुनै चासो नदेखाएको भन्दै आक्रोशित मिटरब्याज पीडितहरूले यही जेठ १९ गते धनुषा जिल्ला अदालत घेराउ गर्ने घोषणा गरेका छन् । मिटरब्याजविरुद्ध किसान मजदुर आन्दोलन (नेपाल मिथिला कमान्ड) ले बिहीबार जनकपुरधाममा पत्रकार सम्मेलन गर्दै आन्दोलनको कडा कार्यक्रम सार्वजनिक गरेको हो ।

पत्रकार सम्मेलनमा बोल्दै मिथिला कमान्डका इन्चार्ज मोहन महतोले आगामी मंगलबार मिथिला र भोजपुरा कमान्डको संयुक्त नेतृत्वमा धनुषा जिल्ला अदालत घेराउ गरिने जानकारी दिए । पीडितहरू विगत १२ दिनदेखि निरन्तर आन्दोलनरत रहे पनि राज्यपक्ष र सम्बन्धित निकाय उनीहरूको पीडाप्रति कतिपय संवेदनशील नभएको महतोले आरोप लगाए ।

"हामी विगत १२ दिनदेखि सडकमा छौँ, तर राज्यले हाम्रो आवाज सुनेको छैन । छलफलका नाममा मिटरब्याजी शोषकहरूले उल्टै बेवास्ता गरिरहेका छन्," इन्चार्ज महतोले आक्रोश पोख्दै भने, "पीडितहरूको समस्यालाई नजरअन्दाज गरिएकाले अब हामी निर्णायक आन्दोलनमा होमिन बाध्य भएका हौँ । जेठ १९ गते मिथिला कमान्डको अगुवाइमा धनुषा जिल्ला अदालत घेराउ गरिँदैछ, जहाँ ८ देखि १० हजार पीडित सडकमा उत्रिनेछन् ।"

उक्त घेराउ कार्यक्रमलाई सफल पार्न मधेस प्रदेशका विभिन्न जिल्लाहरूबाट ८ देखि १० हजारको संख्यामा पीडितहरू जनकपुरधाम ओर्लिने मिथिला कमान्डले जनाएको छ ।