बलिउडकी चर्चित अभिनेत्री प्रियंका चोपराले वरिष्ठ कलाकार सुनिल थापाको निधनप्रति सामाजिक सञ्जालमार्फत भावुक श्रद्धाञ्जलि अर्पण गरेकी छन् । थापाको निधनले आफूलाई गहिरो पीडा पुगेको उल्लेख गर्दै उनले उनलाई जीवनभर नबिर्सिने बताएकी छन् ।

प्रियंकाले फेसबुकमा फिल्म ‘मेरी कोम’ का क्रममा थापासँग खिचिएको एक भिडियो पोस्ट गर्दै लेखेकी छन्, “तपाईं सधैं मेरा कोच सर नै रहनुहुनेछ । मैले बाबालाई गुमाएको त्यो कठिन समयमा तपाईंले मलाई सम्हाल्नुभयो । थाहा नपाउँदै पनि तपाईंले मलाई माया गर्नुभयो र धेरै अप्ठ्यारा दिनहरू पार गर्न सहयोग गर्नुभयो ।”

उनले थापाको न्यानो अँगालो र हाँसो सधैं आफ्ना सम्झनामा जीवित रहने उल्लेख गर्दै अत्यन्तै कम उमेरमै उनको निधन भएकोप्रति दुःख व्यक्त गरेकी छन् । “म टुटेको बेला देखाउनुभएको तपाईंको दयालुता र साथका लागि हृदयदेखि धन्यवाद,” भन्दै प्रियंकाले स्वर्गीय थापाप्रति श्रद्धाञ्जली अर्पण गरेकी छन् । साथै, उनले थापाको परिवार तथा आफन्तजनप्रति गहिरो समवेदना र प्रार्थना व्यक्त गरेकी छन् ।

सुनिल थापा र प्रियंका चोपरा सन् २०१४ मा प्रदर्शन भएको बलिउड फिल्म ‘मेरी कोम’ मा सँगै काम गरेका थिए । उक्त फिल्ममा थापाले प्रियंकाको कोचको भूमिका निर्वाह गरेका थिए ।