डेढ महिनामा काभ्रेपलाञ्चोकका नौ स्थानीय तहमा डेङ्गी फैलिएको छ। शुक्रबार मात्रै एकैदिन ६ जनामा डेङ्गी सङ्क्रमण पुष्टि भएको जनस्वास्थ्य कार्यालय धुलिखेलले जानकारी दिएको छ।

पछिल्लो २४ घण्टामा पनौती नगरपालिकामा दुई पुरुष र एक महिला, बनेपा नगरपालिकामा एक महिला, मण्डनदेउपुर नगरपालिका र भुम्ल गाउँपालिकामा एक-एक पुरुषमा डेङ्गी देखिएको छ।

साउनदेखि हालसम्म जिल्लामा ५७ जनामा डेङ्गी सङ्क्रमण पुष्टि भएको छ, जसमा २७ पुरुष र ३० महिला रहेका छन्।

जिल्लामा डेङ्गीको उच्च जोखिम रहेका नगर र गाउँपालिकाहरूमा बनेपा, पनौती, र धुलिखेल प्रमुख छन्। यी स्थानहरूमा क्रमशः १३, १३, र १२ जनामा सङ्क्रमण देखिएको छ।

‘डेङ्गी नियन्त्रण गर्न सचेतना कार्यक्रम बढाउँदै लैजाने छौं,’ जनस्वास्थ्य कार्यालय प्रमुख रागीश्री कक्षपति श्रेष्ठले भनिन्। डेङ्गीको जोखिम न्यूनीकरणका लागि प्रत्येक शुक्रबार ‘१० बजे दश मिनेट’, ‘खोज र नष्ट गर’ अभियान सञ्चालन गर्दै आइएको जानकारी दिइन।

डेङ्गीका लक्षणमा उच्च ज्वरो, टाउको, आँखाको नानी, ढाड, जोर्नी, मांसपेशीमा दुखाइ, शरीरमा बिमिरा, वाकवाकी, पेट दुखाइ, रगत बग्नु, र शरीरमा रगत जम्ने दाग समावेश छन्। समयमै उपचार नगरेमा मृत्युको जोखिम पनि रहने भएकाले शंका लागेमा तुरुन्त स्वास्थ्यकर्मीको सल्लाह लिन आग्रह गरिएको छ।