राष्ट्रिय ग्रामीण यातायात सुदृढीकरण कार्यक्रमअन्तर्गत निर्माण गरिएको कुशहा–मौवहा–बेल्ही सडक जीर्ण हुँदा स्थानीयवासी सास्ती खेप्न बाध्य भएका छन् ।

सुरुङ्गा नगरपालिका–१० का रोशनकुमार साहका अनुसार कलोपत्र उप्किएर सडक माटो र बालुवामा परिणत भएको छ। वर्षाको समयमा हिलो र हिउँदमा धुलोका कारण यात्रुहरूलाई समस्या भइरहेको छ ।

विसं २०७६ मा निर्माण सम्पन्न भएको करिब १६.५ किलोमिटर लामो यो सडकको मर्मतबिना नै जीर्ण बनेको छ । बलानबिहुल गाउँपालिका–१ का रासिन्द्र यादवले सडक छेउका घरहरू धुलाम्मे भएको र स्वास्थ्यमा प्रतिकूल असर पर्न थालेको बताए ।

बलानबिहुल गाउँपालिकाका अध्यक्ष खेमचन्द्र यादवले शीघ्र मर्मत नभए आन्दोलन गर्ने चेतावनी दिएका छन्। उनले संघीय सरकार र प्रदेश सरकारको ध्यानाकर्षण गराइएको बताए ।

जिल्ला प्राविधिक कार्यालय सप्तरीले पप्पु मृत सञ्जीवनी जेभी काठमाडौँ कम्पनीलाई रु ११ करोड १ लाख ७९ हजार ५५२ मा ठेक्का दिएको थियो। तर ग्राभेल मात्र सकेर निर्माण अधुरै छाडिएको स्थानीय राजाराम यादवले बताए ।

सडक छेउमा वृक्षरोपण गर्ने योजना रहे पनि चरम लापरबाहीका कारण यो कार्य पनि अलपत्र परेको छ। सफाइ नहुँदा बनमारा झाडी उम्रेर सडक कुरुप देखिएको छ ।

२०७५ कात्तिक १५ मा अख्तियार दुरुपयोग अनुसन्धान आयोग इटहरी ले छानबिन अघि बढाएपछि निर्माण कम्पनीले कालोपत्र गरेको थियो। तर, स्थानीयका अनुसार काम गुणस्तरीय नभएकै कारण केही वर्षमै सडक जीर्ण भएको छ ।

निरन्तरको बेवास्ताले स्थानीयवासी अन्योलमा छन् । अधुरो निर्माणका दोषी को? सरकारी अनुगमन किन नगरेको? र समस्या समाधान कहिले? यी प्रश्नहरू अहिले स्थानीय बासिन्दामाझ उठिरहेका छन् ।