चितवनको वीपी कोइराला मेमोरियल क्यान्सर अस्पतालले चालु आर्थिक वर्षभित्र थप २ वटा फार्मेसी र डेन्टल सेवा सुरु गर्ने घोषणा गरेको छ। २५औं वार्षिकोत्सवको अवसरमा आयोजित पत्रकार सम्मेलनमा अस्पतालका अध्यक्ष डा. विजय न्यौपानेले बिरामीहरूको सुविधाका लागि फार्मेसी सेवा विस्तार गर्न र डेन्टल सेवा सञ्चालनमा ल्याउन तयारी भइरहेको जानकारी दिए।

अस्पतालमा बिरामीहरूको चाप बढेसँगै फार्मेसी सेवालाई सुधार गर्न दुई नयाँ फार्मेसी थपिनेछ। डेन्टल सेवा क्यान्सर भएका बिरामीहरूका लागि विशेष उपचार उपलब्ध गराउने उद्देश्यले सुरु गरिने छ।

गत वर्ष अस्पतालको बहिरंग विभागमा १ लाख ८८ हजार ५ सय १४ बिरामीले सेवा लिएका थिए। क्यान्सर रोगको निदान पाएका बिरामीहरूको संख्या अघिल्लो वर्षको तुलनामा बढेर ६ हजार ७ सय ९५ पुगेको थियो।

अस्पतालले सर्जिकल अंकोलोजी, मेडिकल अंकोलोजी, रेडियसन अंकोलोजी, प्याथोलोजी, रेडियोडायग्नोसिस, न्यूक्लियर मेडिसिन, एनेस्थेसियोलोजी लगायतका सेवाहरू प्रदान गर्दै आएको छ। बोनम्यारो प्रत्यारोपण, टोमोथेरापी, पेट सि.टी. स्क्यान सेवा सञ्चालनको तयारी पनि भइरहेको छ।

कार्यकारी निर्देशक डा. शिवजी पौडेलका अनुसार बायोप्सी परीक्षण समयलाई घटाउन व्यवस्थापन सुधार गरिएको छ। मेजर बायोप्सीको रिपोर्ट ३ महिना लाग्ने समस्यालाई सुधार गरी एक महिनाभित्र उपलब्ध गराइनेछ। अस्पतालले क्यान्सर सचेतना, स्क्रीनिङ्ग, र खोप सम्बन्धी विभिन्न कार्यक्रमहरू पनि सञ्चालन गर्दै आएको छ।