राष्ट्रिय प्रजातन्त्र पार्टी (राप्रपा) ले पार्टीहित विपरीत गतिविधि गरेको आरोपमा आठ जना नेतामाथि स्पष्टीकरण सोध्दै अनुशासनात्मक कारबाही प्रक्रिया अघि बढाएको छ।

काठमाडौं र सुर्खेतमा भएको आन्तरिक विवाद तथा हो–हल्ला घटनामा संलग्न भएको भन्दै उनीहरूलाई स्पष्टीकरण सोधिएको र कारबाहीको तयारी गरिएको राप्रपा सचिवालयले जनाएको छ।

युवा संगठन, राष्ट्रिय प्रजातान्त्रिक युवा संगठनको काठमाडौंमा २८ साउनमा सम्पन्न अधिवेशनमा हुलदंगा गरेको आरोपमा चार जनालाई स्पष्टीकरण सोधिएको हो। सो समूहमा केन्द्रीय सहायक प्रवक्ता प्रवीण थोकर तामाङ, पार्टी काठमाडौं जिल्ला अध्यक्ष नवराज सिम्खडा, काठमाडौं–४ अध्यक्ष रिद्धिप्रताप राणा र असन्तुष्ट पक्षले युवा संगठनको काठमाडौं जिल्ला अध्यक्ष बनाएका ज्योति लामा रहेका छन्।

लिङ्देन पक्षका एक नेताका अनुसार, अधिवेशन भाँड्न बाहिरका व्यक्तिलाई सहभागी गराएर कार्यक्रम अवरुद्ध गरिएको र अधिवेशन स्थगित भइसकेपछि समिति घोषणा गर्ने प्रयास भएको थियो। सोही कारण चारै जनासँग स्पष्टीकरण मागिएको र उनीहरूले जवाफ पनि दिएका छन्। अनुशासन समितिको बैठक बसेर कारबाहीको टुंगो लगाइने बताइएको छ।

यस्तै, सुर्खेतस्थित केन्द्रीय कार्यालय तालाबन्दी गराउन उक्साएको आरोपमा तीन जना नेतामाथि पनि कारबाही प्रक्रिया सुरु भएको छ। अध्यक्ष राजेन्द्र लिङ्देनले पदमुक्त गरेका उपाध्यक्ष मुकुन्दश्याम गिरीको गृहजिल्ला सुर्खेतमा तालाबन्दी गराउन उनीहरूले भूमिका खेलेको संस्थापन पक्षको आरोप छ।

यस घटनामा केन्द्रीय सदस्य जनक सिंह, भीमबहादुर शाही, युवा संगठनका प्रेम बिसी र लक्ष्मी कुमारी सार्की संलग्न रहेको उल्लेख गर्दै उनीहरूविरुद्ध पनि स्पष्टीकरण सोधिएको छ। सार्कीले अनधिकृत रूपमा कार्यसमितिको बैठक आह्वान गरेको आरोप समेत लगाइएको छ।

राप्रपा सचिवालयका अनुसार रोशन कार्की नेतृत्वको अनुशासन समितिले सबै स्पष्टीकरण प्राप्त गरिसकेको छ र अब कारबाही प्रक्रियालाई अघि बढाउँदै छ।