उपमेयर डंगोलले महानगर प्रहरीलाई संस्थाको प्रतिनिधित्व गर्न सुझाव दिइन् । 

काठमाडौँ महानगरपालिकाकी उपमेयर सुनिता डंगोलले महानगर प्रहरीलाई व्यक्तिको प्रतिनिधि नभई संस्थाको प्रतिनिधि भएर काम गर्न सुझाव दिएकी छन्। ३३ औँ महानगर प्रहरी दिवसको अवसरमा शनिबार काठमाडौँमा आयोजित कार्यक्रममा उपमेयर डंगोलले यस्तो सुझाव दिएकी हुन्।

महानगर प्रहरी मेयर बालेन्द्र साहको निर्देशनअनुसार मात्रै चल्ने गरेकोप्रति लक्षित गर्दै उनले फिल्डमा खटिँदा व्यक्तिको नभई संस्थाको प्रतिनिधि भएर खटिन आग्रह गरिन्। साथै, कानुनी शासनको प्रतिनिधित्व गर्ने कुरामा मानक स्थापना गर्नुपर्ने पनि उनले जोड दिइन्।

उपमेयर डंगोलले काठमाडौँ महानगरपालिकामा सुशासन स्थापना गर्न उदाहरण बन्नको लागि सबै नगर प्रहरीलाई सक्रिय रहन आग्रह गरिन्।