नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले नेता–कार्यकर्तालाई सडक आन्दोलनमा एकजुट हुन आह्वान गरेका छन्।

शनिबार काठमाडौंमा आयोजित एक कार्यक्रममा सम्बोधन गर्दै उनले अब आन्दोलन गर्नुबाहेक कुनै विकल्प नभएको दाबी गरे। “हामी सबै एकढिक्का भएर सडकमा जाने हो, आन्दोलनमा जाने हो,” प्रचण्डले भने, “बरु फेरि जेल, नेल, यातना खान पनि तयार हुनुपर्छ।”

उनले दलित अधिकारका सवालमा सदनले मात्र ऐन बनाउन वा प्राधिकरण गठन गर्नेजस्ता कार्यले वास्तविक अधिकार नदिने भन्दै आन्दोलनबाटै अधिकार प्राप्त गर्न सकिने बताए।

‘हिजोजस्तो शक्ति छैन’

प्रचण्डले आफ्नो राजनीतिक प्रभाव हिजोजस्तो नभएको पनि स्वीकार गरेका छन् । “हामीलाई शक्ति चाहिन्छ । जनयुद्धपछि शान्ति प्रक्रियामा आउँदा संगठन त्यति ठूलो थिएन तर राप थियो, ताप थियो, वाइसिएल थियो, सेना थियो,” उनले भने, “त्यो बेला म चुनावमा भोट हाल्न जाँदा जनमुक्ति सेनाका दुई गाडी अघिपछि हुन्थे । त्यो बेला ‘प्रचण्ड’ भन्नेबित्तिकै मान्छेले फरक रूपमा बुझ्थे। अहिले त्यो छैन।”