राष्ट्रिय प्रजातन्त्र पार्टी (राप्रपा) को संस्थापन इतर समूहको बैठक आइतबार सम्पन्न भएको छ।

महामन्त्री डा. धवल शमशेर राणा निकट पक्षका केन्द्रीय सदस्यहरूको सहभागितामा काठमाडौँमा भएको बैठकमा विभिन्न ६ एजेन्डामा छलफल भएको र तिहारलगत्तै देशव्यापी केन्द्रीय समिति भेला गर्ने निर्णय गरिएको एक नेताले जानकारी दिएका छन् ।

बैठकमा संस्थापन पक्षले गरेको भनिएको अवैधानिक निर्णयहरूलाई चुनौती दिने, नियमित महाधिवेशनको मिति घोषणाका लागि दबाब सिर्जना गर्ने र अवैधानिक रूपमा गरिएको कारबाही फिर्ता गर्नुपर्ने विषयमा सहमति भएको बताइएको छ।

त्यससँगै, जेनजी आन्दोलनपछि पार्टी नेतृत्वको भूमिकाप्रति गम्भीर आपत्ति जनाउने र केन्द्रीय समितिको बैठक तत्काल आह्वान गर्नुपर्ने निष्कर्ष पनि बैठकले निकालेको छ।

बैठकमा काठमाडौँमा रहेका ९६ जना केन्द्रीय सदस्यहरूको उपस्थिति रहेको थियो।