आगामी फागुन २१ गते हुने निर्वाचनमा भाग लिन चाहने नयाँ राजनीतिक दलहरूले यही कात्तिक ३० गतेभित्र निर्वाचन आयोगबाट दल दर्ताको प्रमाणपत्र लिइसक्नुपर्ने भएको छ ।

निर्वाचन आयोगका प्रवक्ता नारायणप्रसाद भट्टराईका अनुसार, कात्तिक ३० गते निवेदन दिने अन्तिम मिति नभई ‘दल दर्ताको प्रमाणपत्र लिइसक्नुपर्ने’ अन्तिम मिति हो ।

आयोगका एक अधिकारीका अनुसार, दल दर्ताको निवेदन दिएको ४५ दिनभित्र आयोगले निर्णय दिनुपर्ने कानुनी व्यवस्था भए पनि निर्वाचनको सम्मुखमा भएकाले यो प्रक्रिया छिटो अघि बढाइएको छ । "व्यवहारिक रूपमा हेर्दा, सबै कागजपत्र मिलेर कात्तिक २५ गते अगाडि निवेदन आइसकेको खण्डमा मात्र कात्तिक ३० गतेसम्म दल दर्ताको प्रमाणपत्र दिन सकिन्छ," ती अधिकारीले भने ।

निर्वाचन आयोगमा हाल १६ वटा नयाँ दल दर्ताका लागि निवेदन परेको छ, जसमध्ये ७ वटा निवेदन जेनजी आन्दोलनपछि परेका हुन् । आयोगका सूचना अधिकारी सुमन घिमिरेका अनुसार, यी सबै १६ निवेदन अध्ययनको क्रममा छन् ।

केही दललाई विधान स्पष्ट पार्न र केहीलाई सनाखतका लागि आवश्यक संख्या पुर्‍याउन भनिएको छ । हालसम्म आयोगमा दर्ता कायम रहेका दलहरूको संख्या १२४ छ । यसबीचमा जनमत पार्टी फुटेर ‘जनस्वराज पार्टी’ र नेपाल जनमुक्ति पार्टी फुटेर अर्को नयाँ दल दर्ता भइसकेका छन् ।

दर्ता प्रक्रियामा रहेका दलहरूमा धरानका मेयर हर्क साम्पाङ अध्यक्ष रहेको ‘श्रम संस्कृति पार्टी’ र दिनेश प्रसाईं अध्यक्ष रहेको ‘गतिशील लोकतान्त्रिक पार्टी’ पनि छन् ।

यस्तै, ‘राष्ट्रिय जेनजी पार्टी नेपाल’ ले चुनाव चिन्ह ‘क्रस खुकुरी’ प्रस्ताव गरेकोमा आयोगले उक्त चिन्ह फेर्न आग्रह गरेको छ । ‘राष्ट्रिय परिवर्तन पार्टी’ (अध्यक्ष अजयकुमार, चुनाव चिन्ह बाँसुरी) र ‘नेपाल लिबरल पार्टी’ (अध्यक्ष गोपीलाल न्यौपाने, चुनाव चिन्ह सिक्का) पनि दर्ताका लागि पुगेका छन् । यसअघि नै नेपाल नागरिक पार्टी र उज्यालो नेपाल पार्टीले पनि निवेदन दिइसकेका छन् ।

आयोगको कार्यतालिका अनुसार, नयाँ दलहरूले कात्तिक ३० गतेसम्म दल दर्ताको प्रमाणपत्र लिनु पहिलो चरण मात्र हो ।

निर्वाचनमा भाग लिनका लागि, यी नयाँ दलसहित पुराना सबै दलहरूले पुनः मंसिर १ गतेदेखि १० गतेसम्म ‘निर्वाचन प्रयोजनका लागि’ छुट्टै दल दर्ता गराउनुपर्नेछ ।

यस्तो छ निर्वाचन कार्यतालिका

निर्वाचन प्रयोजनका लागि दल दर्ता: मंसिर १ – १० गते

समानुपातिकतर्फ निर्वाचन अधिकृतको कार्यालय स्थापना: मंसिर १५ गते

समानुपातिक बन्दसूची पेश: पुष १८ – १९ गते

प्रत्यक्षतर्फ निर्वाचन अधिकृतको कार्यालय स्थापना: माघ २ गते

निर्वाचन प्रचारप्रसार: फागुन ३ – १८ गते

मतदान: फागुन २१ गते (बिहान ७ बजेदेखि बेलुका ५ बजेसम्म)