नेकपा माओवादी केन्द्रसँगको एकता सम्भावना टर्दै गएपछि नेपाल कम्युनिस्ट पार्टी (नेकपा) का महासचिव नेत्रविक्रम चन्द ‘विप्लव’ निर्वाचन आयोगमा आफ्नै पार्टी दर्ता गराउन पुगेका छन् । लामो समयदेखि वामपन्थी एकताको पहल भए पनि ठोस निष्कर्षमा पुग्न नसक्दा विप्लवले १३ वर्षपछि संसदीय राजनीतिमा औपचारिक पुनरागमनको बाटो रोजेका हुन् ।

मंगलबार महासचिव विप्लवका प्रवक्ता खड्गबहादुर विश्वकर्माको नेतृत्वमा टोली निर्वाचन आयोग पुगेको थियो । टोलीले आयोगमा “कम्युनिस्ट पार्टी नेपाल” नाममा दल दर्ताका लागि निवेदन दिएको छ । आयोगका प्रवक्ता नारायणप्रसाद भट्टराईका अनुसार निवेदन दर्ता भइसकेको र छानबिन तथा रुजु प्रक्रिया अघि बढाइएको छ ।

सञ्चारकर्मीसँग कुरा गर्दै प्रवक्ता विश्वकर्माले भने, “आजको दिन ऐतिहासिक हो । यो नेपाली जनताको प्रतीक्षा गरेको दिन हो । जनताको निर्णय गर्ने अधिकारलाई संस्थागत गर्ने दिन यही हो ।”

उनका अनुसार आगामी फागुन २१ गतेलाई घोषणा गरिएको प्रतिनिधिसभा निर्वाचनमा विप्लव नेतृत्वको पार्टी सहभागी हुनेछ । प्रधानमन्त्री पुष्पकमल दाहाल ‘प्रचण्ड’ अहिले समाजवादी मोर्चामा रहेका वामपन्थी दलहरूलाई एउटै पार्टीमा एकीकृत गर्ने गृहकार्यमा छन् । उक्त मोर्चाका संयोजक विप्लव स्वयं हुन् ।  

माओवादी केन्द्रका एक नेताका अनुसार विप्लवले प्रचण्डसँगको वार्तामा आफूलाई नेतृत्व सुम्पिनु पर्ने प्रस्ताव राखेपछि तत्काल एकताको सम्भावना कमजोर बनेको हो । विप्लबले एकाएक उग्र महत्वकांशा राखेकाले माओवादी केन्द्रसँगको एकता करिबकरिब अन्त्य भएको छ । हिजोमात्र विप्लबले एउटा पत्रिकासँग अन्तर्वार्ता दिँदै उनले अब एमाले सँग पार्टी एकताका लागि पहल गर्ने बताइसकेका छन् । 

यता, मोर्चाभित्र माधवकुमार नेपाल नेतृत्वको नेकपा (एकीकृत समाजवादी) र महेन्द्रराय यादव नेतृत्वको नेसपा माओवादीसँग पार्टी एकताको पक्षमा छन् । तर नेकपा (एस) भित्रका सम्मानित नेता झलनाथ खनाल र महासचिव घनश्याम भुसाल तत्काल माओवादीसँग एकता नगर्ने धारमा छन् । 

स्रोतका अनुसार प्रचण्डले माओवादी पार्टीको नाम र चुनाव चिन्हसमेत त्यागेर नयाँ एकीकृत पार्टी निर्माण गर्न सहमति जनाएका छन् । नेकपा (एस) को आजबाट सुरु हुने बैठकले यसबारे औपचारिक निर्णय गर्ने तयारी अध्यक्ष माधव नेपालको छ ।

माओवादी केन्द्रका सचिव डोरप्रसाद उपाध्यायले पनि विप्लव पक्षसँगको वार्ता औपचारिक ढङ्गले अघि नबढेको बताए । “नेकपा (एस) सँग कुरा लगभग टुंगिएको छ, तर विप्लवजीको पार्टीसँगको प्रक्रिया स्थगित छ,” उनले भने ।

विप्लव २०६९ असारमा तत्कालीन एकीकृत नेकपा (माओवादी) बाट मोहन वैद्य ‘किरण’सँगै अलग भएका थिए । २०७० सालमा दोस्रो संविधानसभा निर्वाचन बहिष्कार गर्दै जनविद्रोहको घोषणा गरेका उनले २०७१ साल मंसिर ८ गते राष्ट्रिय नाचघरमा आयोजित भेलामा “नेकपा (माओवादी क्रान्तिकारी)” नामक नयाँ संगठन स्थापना गरेका थिए ।

संसदीय प्रणालीप्रति तीव्र आलोचनात्मक दृष्टिकोण राख्दै उनले त्यसलाई “खसीको टाउको देखाएर कुकुरको मासु बेच्ने थलो” भनेर व्याख्या गरेका थिए । पछि पार्टी पुनर्गठन गर्दै “नेपाल कम्युनिस्ट पार्टी (नेकपा)” नाम राखेका थिए ।

२०७४ सालमा सरकारले विप्लव नेतृत्वको नेकपामाथि प्रतिबन्ध लगायो । त्यसपछि भूमिगत रहँदै आएका उनले २०७७ फागुन २१ गते सरकारसँग तीन बुँदे सहमति गरेपछि भूमिगत राजनीति अन्त्य गरेका थिए ।

अहिले विप्लब संसदिय राजनीतिमा फर्किनुमा उनमा क्रान्तिको नारा लगाउदा लगाउदा जनताहरुले पत्याउन छोडेपछि बाध्य भएर पुरानै बाटोमा फर्किएका छन् । जनक्रान्तिको नाममा करिब सय जनाले ज्यान गुमाईसकेका छन् । जनक्रान्तिको नाममा सयौंजनाको ज्यान गइसकेपछि भने विप्लब संसदीय राजनीतिमा प्रवेश गरेर विप्लब आफैलाई प्रधानमन्त्री बन्नुपर्ने वकालत गरिरहेका छन् ।