“हामी नेपाल” नामक गैरसरकारी संस्थाका संयोजक सुदन गुरुङले जेन–जी आन्दोलनको नाममा स्थापित सरकार ढाल्ने कुनै षड्यन्त्र भए त्यसविरुद्ध कडा रूपमा उभिने चेतावनी दिएका छन्। उनले आंदोलनलाई राजनीतिक स्वार्थमा प्रयोग गरेर सरकार ढाल्ने प्रयासहरू रोक्न आफूहरू तयार रहेको बताएका छन्।

गुरुङले सामाजिक सञ्जालमार्फत जारी गरेको वक्तव्यमा सरकारले प्रदर्शनकारीहरूप्रति देखाएको उदासीनता र गृहमन्त्रीको कार्यप्रणालीप्रति कडा आलोचना गरे तापनि, “हामी यस सरकारको ढाल बनेर उभिएका छौं” यो सरकार गैरकानुनी रूपमा ढाल्ने प्रयास भए आफूहरू अडिग रहने दाबी गरेका छन्।

उनले भनेका छन्, “हाम्रो सडकमा उपस्थित हुनुको उद्देश्य मन्त्री बनाउनु होइन — हामी स्कुले पोशाकमा मारिएका बालबालिकाको न्याय, भ्रष्टाचार र राज्यको दमनविरुद्ध, सत्य र जवाफदेहिताका लागि आएका हौँ। हामीलाई भाषण होइन, काम चाहिएको छ।” गुरुङले वर्तमान गृहमन्त्रीको काम पुराना सरकारजस्तै रहने हो भने त्यसलाई सहन नहुने चेतावनीसमेत दिएका छन्।

उनले अन्तरिम सरकारले छिट्टै निर्वाचनको व्यवस्था मात्र नभई आन्दोलनलाई वैधानिकता दिने कदम उठाउनुपर्ने मागसमेत राखेका छन्। गुरुङले यो आन्दोलन कुनै पद दिलाउन नभई “रगत, आँसु र सपनाको लडाइँ” भएकोले यसको गरिमालाई सुरक्षित गर्न सरकार र राजनीतिक दल दुवैको जिम्मेवारी रहेको बताए।

गुरुङले फेसबुकमा व्यक्त गरेको धारणा-

हो, हामी गृह मन्त्रालयको कामबाट सन्तुष्ट छैनौँ। यो भावना होइन, तथ्यमा आधारित असन्तुष्टि हो। यो गृहमन्त्रीको असक्षमता र गैरजवाफदेहिताको आलोचना हो, न कि आम नागरिक र आन्दोलनको अनादर। या सरकार ढलाउने खेल वा सविधान माथि धावा।

हामी सडकमा कसैलाई मन्त्री बनाउन आएका थिएनौ, हामी स्कुले पोशाकमा मारिएका बालबालिकाको न्यायका लागि, भ्रष्टाचार र राज्य आतङ्कविरुद्ध, र सत्य तथा जवाफदेहिताको लागि आएका हौँ। हामीलाई भाषण होइन, काम चाहिएको हो। योग्यताको प्रमाण पदले होइन, परिणामले दिनुपर्छ। यदि वर्तमान गृहमन्त्रीको काम पुराना सरकारजस्तै भयो भने हामी चुप बस्दैनौँ।

सरकारलाई सहयोग गर्छु तर प्रतिपक्षमा पनि बस्छु भन्ने मेरो हरेक सहिद परिवारप्रति बाचा हो र म आफ्नो जिम्मेवारी पूरा गर्दैछु किनकि हामीलाई कुर्सी होइन, न्याय चाहिएको हो। हामी आफ्नै सरकारका मन्त्रीलाई प्रश्न गर्न डराउँदैनौँ, किनकि म्यान्डेट जनताले दिएको हो। आज उँहाहरुले म्यान्डेट बिर्सने हो भने सोच्नुस्, जब अरू पार्टीका हातमा त्यो कुर्सी पुग्छ भने देश कता जान्छ? कलीलो बालबालिकाको हत्या, आन्दोलनमा भएको अत्याचार, र पीडित परिवारप्रति राज्यको वेवास्ता र असक्षमता हामी सहदैनौँ।

अन्तरिम सरकारले चुनाव मात्र होइन, आन्दोलनलाई वैधानिकता दिने कदम पनि तुरुन्त अघि बढाउनु पर्छ, किनकि यो आन्दोलन कसैलाई पद दिलाउनको लागि थिएन, यो रगत, आँसु र सपनाको लडाइँ हो। नेपाली भन्नुको अस्तित्व र भविष्यका लागि हो। हाम्रो देश बन्न सक्छ भन्ने विश्वासका लागि हो।

जो कोही अहिले राजनीतिक खेल खेल्दै सरकार ढाल्ने वा आन्दोलन कमजोर पार्ने प्रयासमा छन्, उनीहरूले याद राखुन् प्रधानमन्त्री र जिम्मेवार मन्त्रीहरूको ढाल भएर हामी उभिएका छौँ, उनीहरूसम्म पुग्नुभन्दा पहिले हामीलाई पार गर्नुपर्छ। हामीले प्रधानमन्त्रीलाई जिम्मा लगाइएको मुलुक हो, आशा मार्ने होइन, जोगाउने हो भन्ने विश्वाससहित। खबरदारी नागरिक कर्तव्य हो, प्रगतिशील लोकतन्त्रमा युवा नै सरकारका स्वाभाविक प्रतिपक्ष हुन्छन्। जो कोही यो समय गलत राजनीतिक खेल खेल्ने, हाम्रो सरकार ढाल्ने, वा यो नाजुक परिस्थितिको फाइदा उठाउने सोचमा छन् ।