पूर्व प्रधानमन्त्री डा. बाबुराम भट्टराईले नेपाल र नेपाली समाज हाल इतिहासकै सबभन्दा कमजोर र अन्योलपूर्ण अवस्थामा रहेको टिप्पणी गरेका छन्। सामाजिक सञ्जालमार्फत उनले राष्ट्रको समग्र अवस्थाप्रति चिन्ता व्यक्त गर्दै लेखे- “नेपाल र नेपाली राष्ट्र, राज्य, समाज, अर्थतन्त्र, लोकतन्त्र, संस्कृति र मनोबल यतिवेला सम्भवतः इतिहासमै सबभन्दा कमजोर, अस्थिर र अन्योलको अवस्थामा छन्।”

उनका अनुसार, यस्तो कठिन घडीमा परस्पर आरोप–प्रत्यारोप र आन्तरिक द्वन्द्व होइन, एकताबद्ध प्रयास आवश्यक छ। उनले भने,
“घरमा आगो लागेको बेला को ठूलाे कोठामा सुत्ने, कसले ठूलो भाग खाने भनेर झगडा गर्ने समय होइन। सबै मिलेर आगो निभाउने र नयाँ, अझ सुन्दर घर बनाउने सङ्कल्प गर्ने बेला हो।”

डा. भट्टराईले सबै राजनीतिक शक्ति र जिम्मेवार व्यक्तिहरूले गम्भीर आत्मसमीक्षा गर्न सके मात्र देशलाई सही दिशातर्फ लैजान सकिने उल्लेख गरे। आत्मसमीक्षा नगर्ने हो भने इतिहासले कसैलाई क्षमा नगर्ने चेतावनी पनि उनले दिएका छन्।