एमाले उपाध्यक्ष पीएस गुरुङले पुराना राजनीतिक दलहरू असान्दर्भिक नभएको दाबी गरेका छन्। प्रेस चौतारीद्वारा आयोजित साक्षात्कार कार्यक्रममा बोल्दै उनले जनताले नयाँ अनुहारभन्दा सुधारिएका दल, स्पष्ट भिजन र ठोस नीति खोजिरहेको बताए।
उनले भने, ‘हामी चुनावी मैदानमा होमिइसकेका छौँ तर बजारमा “नयाँ” भन्ने हल्ला चलिरहेको छ। नयाँ भनेको अनुहारमा हो कि विचारमा हो ? जनताले नयाँ अनुहार होइन, सुधारिएको पार्टी खोजेका हुन्। परिष्कृत दृष्टिकोण र नीतिसहित अघि बढेका पार्टी र नेता चाहेका छन्।’

गुरुङले अहिले नेपालको संविधान र राजनीतिक व्यवस्थामाथि आक्रमण भइरहेको आरोप लगाउँदै स्वाधीन नेपालका पक्षमा उभिएको एमाले भएकाले आफूहरूमाथि सबैभन्दा बढी प्रहार भइरहेको दाबी गरे। ‘हामीसँग अनुभव, परिपक्वता र ठोस नीति छ। मुलुक चलाउनसक्ने हिम्मत र अठोट पनि हामीसँग छ। स्पष्ट भिजन बोकेको पार्टी एमाले हो,’ उनले थपे।

उनले नेपाली कांग्रेसमा सभापतिसहित पदाधिकारीमा नयाँ अनुहार आएको भए पनि नयाँ सोच, नीति र कार्यक्रम नदेखिएको टिप्पणी गरेका छन् ।

त्यसैगरी राष्ट्रिय स्वतन्त्र पार्टीले भावी प्रधानमन्त्रीका रूपमा अघि सारेका बालेन शाहले जनताको प्रत्यक्ष सामना गर्न नसक्ने दाबी गर्दै गुरुङले सामाजिक सञ्जालमार्फत भ्रम फैलाउने प्रयास भइरहेको आरोप लगाए र पार्टी पंक्तिलाई सचेत रहन आग्रह गरे।