राष्ट्रिय सभाको उपाध्यक्ष पदमा नेकपा एमालेकी सांसद लिला भण्डारीलाई अघि सार्ने विषयमा प्रमुख राजनीतिक दलहरूबीच सहमति बनेको छ।

नेपाली कांग्रेस, नेकपा र नेकपा एमालेलगायतका दलहरूको सहमतिमा भण्डारीलाई रिक्त उपाध्यक्ष पदमा निर्वाचित गराउने तयारी गरिएको एक सांसदले जानकारी दिएका छन्। उक्त पदका लागि आज मनोनयन प्रक्रिया सुरु हुँदैछ।

कांग्रेसका प्रमुख सचेतक कृष्णबहादुर रोकायाले राष्ट्रिय सभा उपाध्यक्षसहित अन्य पदहरू पनि सहमतिमै टुंग्याउने समझदारी बनेको पुष्टि गरेका छन्।

यसैबीच, संसदीय समितिका सभापतिहरूको बाँडफाँट पनि दलहरूबीच सहमतिमा हुने भएको छ। सहमतिअनुसार कांग्रेसले २, नेकपाले १ र जसपाले १ समिति सभापति पाउनेछन्।

यसअघि राष्ट्रिय सभा उपाध्यक्ष पदमा उर्मिला अर्याल रहेकी थिइन्। उनको कार्यकाल समाप्त भएसँगै उक्त पद केही समयदेखि रिक्त रहेको थियो।