नेपालका नवनियुक्त प्रधानमन्त्री वालेन्द्र (बालेन) शाह विश्वकै प्रभावशाली व्यक्तित्वको सूचीमा परेका छन्। प्रतिष्ठित अमेरिकी म्यागजिन 'टाइम' ले सन् २०२६ का लागि सार्वजनिक गरेको 'विश्वका १०० प्रभावशाली व्यक्ति' (TIME100) को सूचीमा शाहलाई समेटेको हो।

टाइम म्यागजिनले ३५ वर्षीय शाहलाई 'लिडर' (नेता) विधामा सूचीकृत गर्दै नेपालको इतिहासमै कायापलट गर्ने नेतृत्वको रूपमा व्याख्या गरेको छ। सन् २०२५ को 'जेन-जी' (Gen-Z) युवा विद्रोह र त्यसपछिको आम निर्वाचनमा हासिल गरेको ऐतिहासिक जितपछि प्रधानमन्त्री बनेका शाहलाई दक्षिण एसियाकै एक उदीयमान र शक्तिशाली नेताको रूपमा हेरिएको छ।

यो सूचीमा प्रधानमन्त्री शाहसँगै अमेरिकी राष्ट्रपति डोनाल्ड ट्रम्प, चिनियाँ राष्ट्रपति सी जिनपिङ, भारतीय मूलका गुगल सीईओ सुन्दर पिचाई र पपस्टार जेनी जस्ता विश्वचर्चित व्यक्तित्वहरू पनि अटाएका छन्। टाइमले शाहलाई 'र्याप स्टारबाट प्रधानमन्त्री' सम्मको यात्रा तय गरेका र पुराना राजनीतिक दलहरूको सिन्डिकेट तोड्ने साहसी नेताको रूपमा चित्रित गरेको छ।

मुलुकमा भएको ठूलो राजनीतिक उथलपुथलपछि सत्ता सम्हालेका शाहले छोटो समयमै अन्तर्राष्ट्रिय स्तरमा आफ्नो प्रभाव जमाउन सफल भएका हुन्। उनी टाइमको यो प्रतिष्ठित सूचीमा पर्ने नेपालकै पहिलो र कान्छो प्रधानमन्त्री समेत बनेका छन्।