निजी सञ्चारमाध्यमलाई सरकारी विज्ञापनबाट वञ्चित गर्ने सरकारको निर्णयप्रति नेपाली कांग्रेसले कडा आपत्ति जनाएको छ।

सभापति गगनकुमार थापाको अध्यक्षतामा बसेको कार्यसम्पादन समितिको बैठकले उक्त निर्णयले संविधानले प्रत्याभूत गरेको अभिव्यक्ति स्वतन्त्रता र प्रेस स्वतन्त्रतामाथि प्रत्यक्ष आघात पुग्ने ठहर गर्दै सरकारलाई निर्णय सच्याउन आग्रह गरेको हो।

कांग्रेस प्रवक्ता देवराज चालिसे द्वारा जारी विज्ञप्तिमा सरकारले नियमन गर्न सक्छ तर चयनात्मक व्यवहार गर्न सक्दैन भनिएको छ । काँग्रेसले सो निर्णयलाई सच्याइ समान व्यवहार गर्न सरकारलाई आग्रह गरेको छ ।

विज्ञप्तिमा सञ्चारमाध्यमलाई नियमन गर्ने अधिकार सरकारसँग भए पनि कुनै विशेष सञ्चारमाध्यमलाई लक्षित गरी विभेदपूर्ण नीति अपनाउनु लोकतान्त्रिक मूल्य र मान्यताविपरीत भएको उल्लेख गरिएको छ। साथै विज्ञापन वितरण प्रक्रियालाई पारदर्शी, न्यायोचित र मापदण्डमा आधारित बनाउन पनि कांग्रेसले माग गरेको छ।