नेपाली कांग्रेसले गणतन्त्र दिवसको अवसरमा सैनिक मञ्च टुँडिखेलमा आयोजना हुने विशेष समारोहलाई प्रधानमन्त्री बालेन्द्र शाहले सम्बोधन नगर्ने अडान लिनु अत्यन्तै अशोभनीय र गैरजिम्मेवारपूर्ण भएको ठहर गरेको छ । बिहीबार बसेको कांग्रेस संसदीय दलको बैठकले प्रधानमन्त्रीको यस्तो कदम जनताप्रतिको अनुत्तरदायित्वको पराकाष्ठा भएको निष्कर्ष निकालेको हो ।

बैठकपछि सञ्चारकर्मीहरूसँग कुरा गर्दै प्रमुख सचेतक वासना थापाले स्थापित लोकतान्त्रिक परम्परा विपरीत प्रधानमन्त्रीले विशेष समारोहलाई सम्बोधन नगर्ने भनी बाहिर आएको विषयमा गम्भीरतापूर्वक छलफल भएको बताइन् ।

"प्रधानमन्त्रीको यो निर्णयलाई हामीले जनताप्रतिको उत्तरदायित्वको कमी र घोर गैरजिम्मेवारीपनका रूपमा बुझेका छौँ," प्रमुख सचेतक थापाले भनिन्, "यदि समारोहमा जान नसकिने कुनै ठोस कारण थियो भने त्यो खुलाउनुपर्थ्यो । कारण पनि नखुलाउने र सम्बोधन पनि नगर्ने कार्य सर्वसत्तावादी चरित्र हो ।"

प्रधानमन्त्री शाहले गणतन्त्र दिवसको विशेष समारोहमा आफूले सम्बोधन गर्नुको साटो राष्ट्रपति रामचन्द्र पौडेललाई सिफारिस गरेका छन्, जसलाई कांग्रेसले शक्तिको गलत अभ्यास भनेको छ ।

दुई तिहाइको दम्भले जनतामा निराशा
बैठकले शाह नेतृत्वको सरकारका जनविरोधी निर्णय र कार्यशैलीका कारण मुलुकमा चरम निराशा छाएको निष्कर्ष समेत निकालेको छ । सरकारले संसद्लाई समेत लाचार छायाँ बनाउन खोजेको भन्दै कांग्रेसले गम्भीर आपत्ति जनाएको छ ।

विगतमा सरकारहरूले प्रतिपक्षी दलसँग संवाद र सहमतिका आधारमा संसद् सञ्चालन गर्ने गरेको स्मरण गराउँदै प्रमुख सचेतक थापाले भनिन्, "अहिले सरकार दुई तिहाइको मत छ भन्दै विपक्षीलाई पेलेर अघि बढ्न खोज्दैछ । बहुमतको यही दम्भ र अहंकारका कारण जनता सरकारसँग पूर्ण रूपमा निराश भइसकेका छन् ।"

यसैगरी, बैठकमा संसदीय दलको कार्यसमिति गठन गर्ने र संसद्का विभिन्न विषयगत समितिहरूमा पार्टीका तर्फबाट प्रस्तुत गरिने रणनीति तय गर्न संयोजक तोक्ने विषयमा छलफल भए पनि कुनै ठोस निर्णय हुन सकेन ।