प्रतिनिधिसभाको बैठक आज बिहान ११ बजे बस्दैछ। आजको बैठकमा आगामी आर्थिक वर्षको बजेटसँग आश्रित दुई महत्त्वपूर्ण विधेयक र विभिन्न क्षेत्रसँग सम्बन्धित चारवटा अध्यादेशमाथि छलफल तथा निर्णयार्थ प्रस्तुत गरिने कडा कार्यसूची तय गरिएको छ।

बैठकमा अर्थमन्त्री डा. स्वर्णिम वाग्लेले ‘आर्थिक विधेयक, २०८३ माथि विचार गरियोस्’ तथा ‘राष्ट्र ऋण उठाउने विधेयक, २०८३ माथि विचार गरियोस्’ भन्ने प्रस्तावहरू प्रस्तुत गर्ने कार्यसूची रहेको छ। बजेट पारित गर्ने प्रक्रियाका लागि यी दुवै विधेयकलाई महत्त्वपूर्ण मानिन्छ।

आजको बैठकमा सरकारले ल्याएका अध्यादेशहरूमाथि सत्तापक्ष र प्रतिपक्षबीच मतविभाजन हुने देखिएको छ ।

सार्वजनिक खरिद अध्यादेश: ‘सार्वजनिक खरिद (दोस्रो संशोधन) अध्यादेश, २०८३’ लाई अस्वीकार गरियोस् भनी सांसद खडकबहादुर बुढाले राखेको प्रस्तावलाई पहिले निर्णयार्थ प्रस्तुत गरिनेछ। उक्त प्रस्ताव अस्वीकृत भएमा प्रधानमन्त्री बालेन्द्र शाहको तर्फबाट कानुन, न्याय तथा संसदीय मामिला मन्त्री सोबिता गौतमले अध्यादेश स्वीकृत गरियोस् भन्ने प्रस्ताव पेस गर्नेछिन्।

सम्पत्ति शुद्धीकरण अध्यादेश: ‘सम्पत्ति शुद्धीकरण (मनी लाउन्डरिङ) निवारण (तेस्रो संशोधन) अध्यादेश, २०८३’ विरुद्ध सांसद नीता घतानीले दर्ता गराएको अस्वीकृतिको प्रस्तावमाथि निर्णय हुनेछ। त्यसलगत्तै अर्थमन्त्री डा. वाग्लेले उक्त अध्यादेश स्वीकृतिका लागि संसद्मा प्रस्ताव गर्नेछन्।

सहकारी अध्यादेश: संकटग्रस्त भूमि व्यवस्थापनका लागि ल्याइएको ‘सहकारी (पहिलो संशोधन) अध्यादेश, २०८३’ लाई रोक्न सांसद आरन राईले राखेको अस्वीकृतिको प्रस्तावमाथि मतदान हुनेछ। त्यसपछि भूमि व्यवस्था, सहकारी तथा गरिबी निवारण मन्त्री प्रतिभा रावलले उक्त अध्यादेश स्वीकृतिको प्रस्ताव प्रस्तुत गर्नेछिन्।

स्वास्थ्य विज्ञान प्रतिष्ठान अध्यादेश: ‘स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने अध्यादेश, २०८३’ विरुद्ध सांसद कृपाराम रानाले दर्ता गराएको अस्वीकृतिको प्रस्ताव निर्णयार्थ प्रस्तुत हुनेछ। सो प्रस्ताव टुङ्गिएपछि स्वास्थ्य तथा जनसंख्या मन्त्री निशा मेहताले अध्यादेश स्वीकृतिको प्रस्ताव संसद्मा पेस गर्ने कार्यसूची छ।